२०७६ असोज ९, पहिलो नेपाल|
अनेरास्ववियू संयोजक ऐन महरले मण्डलेहरुलाई सलबल नगर्न चेतावनी दिएका छन् । उनले मण्डलेहरुलाई चहलपहल गरे अनेरास्ववियू तह लगाउन तयार रहेको बताए ।
बिहीबार केन्द्रिय प्रविधि क्याम्पस धरानमा अनेरास्ववियूद्वारा आयोजित अगुवा कार्यकर्ता भेला तथा दशै, तिहार शुभकामना आदानप्रदान कार्यक्रममा बोल्दै महरले ग्यानेन्द्रलाई त लखेट्यौँ भने अहिले उसका केही भक्तहरु चहलपहल गर्दैछन् रे तिनलाई ठेगान लगाउन अनेरास्ववियू तयार रहेको उल्लेख गरे ।
साथै उनले मेडिकल क्षेत्र अरुभन्दा संवेदनशील क्षेत्र रहेकोले मेडिकल क्षेत्रका माफियाहरुलाई खेलबाड नगर्न चेतावनी समेत दिएका छन् । उनले अधिक शुल्क लिने मेडिकल कलेजहरुलाई दुई महिनाभित्र शुल्क फिर्ता गर्न सरकारले दिएको निर्देशनको स्वागत गर्दै अविलम्ब कार्यान्वयन गर्न आग्रह पनि गरे ।
नेता महरले संबिधानमा उल्लेख भएको शैक्षिक क्षेत्र सम्बन्धि व्यवस्था , नीतिनियम तथा सरकारले पछिल्लो पटक गरेका निर्णयहरु कार्यान्वयन गर्न शैक्षिक माफियाहरुलाई चेतावनी दिएका छन् ।
कार्यक्रममा तात्कालिक अनेरास्ववियु सचीव ओसिम आलमले सरकारले ल्याएको नीति नियमलाई नमान्ने शैक्षिक माफियाहरुलाई जेल हाल्नुपर्ने बताएका छन् । उनले सरकारले ल्याएको नियम मान्दिन भन्दै सरकारलाई चावी बुझाउने मेडिकल क्षेत्रका शैक्षिक माफियाहरुलाई जेल हाल्नुपर्ने बताएका हुन्।
त्यस्तै तात्कालिक अनेरास्ववियु (क्रान्तिकारी) उपाध्यक्ष दिपेश पुन मगरले राजतन्त्रात्मक व्यवस्था फालेर ल्याएको संविधानले सबैका हक र अधिकार सुनिश्चित गरेकोले यसको कार्यान्वयनमा सबै लाग्नुपर्ने बताए । साथै उनले शिक्षा क्षेत्रमा देखिएका विकृतिबिसङ्गतीहरु बिरुद्ध अनेरास्ववियु सँधै लड्न तयार रहेको उल्लेख गरे ।
कार्यक्रममा अनेरास्ववियूका नेता कार्यकर्ता तथा नेकपाका स्थानीय नेताहरुको समेत बाक्लो उपस्थिति रहेको थियो।
