२०७६ असोज १०, पहिलो नेपाल|
प्रदेश नं १ सामाजिक विकास मन्त्रालयले प्रदेश भित्रका बिद्यालयहरुको सुधारका निम्ति निर्देशिका बनाएको छ । मन्त्रालयले ‘बिद्यालय शिक्षाको शैक्षिक गुणस्तर निर्देशिका , २०७६’ लागु गर्दै प्रदेश भरका सरकारी बिद्यालयलाई सुधार गर्ने योजना बनाएको हो ।
साथै मन्त्रालयले निर्देशिकामा रहेका कार्यक्रम कार्यान्वयनका लागि समिती पनि गठन गरेको छ । समितिको संयोजकमा शिक्षा विकास निर्देशनालय धनकुटाका पुर्व कामु उपेन्द्र दाहाल रहेका छन् । त्यस्तै, सदस्यहरुमा शैक्षिक अभियान्ताहरु बोधराज न्यौपाने, खेमराज पोख्रेल , वसिम आलम , गोबिन्द्र निरौला, बालकुमार रेग्मी , सरोज पौडेल रहेका छन् । समितिको सदस्य सचीवमा सामाजिक विकास मन्त्रालयका शाखा अधिकृत मानबहादुर देवकोटा छन् ।
प्रदेशभरका बिद्यालयहरुमा सरकार, निजि क्षेत्र र साझेदार संस्थाहरु बिचको साझेदारीमा सुचना प्रविधिमा आधारित शिक्षा , पुर्व विद्यार्थी समाजको परिचालन , बिद्यालय बिच मितेरी सम्बन्ध र आमा समुहको परिचालन जस्ता कार्यक्रम मार्फत बिद्यालयहरुको व्यवस्थापन तथा संस्थागत क्षमताको सुधार गरि एक्काइसौं शताब्दी अनुकुल गुणस्तरीय शिक्षा प्रदान गर्न प्रदेश सरकारले प्रशासकीय कार्यविधि ऐन, २०७५ को दफा ३ बमोजिम यो निर्देशिका ल्याएको हो । निर्देशिकामा विभिन्न ८ परिच्छेद रहेका छन् ।
साथै बिद्यालय शिक्षाको शैक्षिक गुणस्तर सुधार प्रदेश निर्देशिका समितिमा विभिन्न सदस्यहरुलाई मनोनीत गरिएको छ। सदस्यहरुमा साझेदार संस्थाका प्रतिनिधिबाट डा. ऋषि शाह (इक्रालिटि फाउन्डेसन नेपाल ), सुर्य कार्की (युनाईटेड वल्ड स्कुल ,नेपाल) , क्षितिज प्रसाईं (युनाईटेड मिसन टु, नेपाल) रहेका छन् ।
त्यस्तै निजि लगानीका बिद्यालय प्रतिनिधिबाट युवराज वशिष्ठ ( निजि बिद्यालय अर्गनाइजेसन प्रदेश नं १ ) रहेका छन् ।
प्रदेश नं १ का सामाजिक विकासमन्त्री जीवन घिमिरेले प्रदेशका सरकारी विद्यालयलाई गुणस्तरीय बनाउँदै डिजिटल शिक्षा प्रदान गर्नका निम्ति यो निर्देशिका ल्याएको बताएका छन् । साथै यश कार्यक्रममा सबैलाई सहयोग गर्न आग्रह पनि गरे ।
त्यस्तै कार्यक्रम कार्यान्वयन समितिका सदस्य ओसिम आलमले यो कार्यक्रम महत्वपूर्ण रहेको र पछिल्लो समय सरकारी विद्यालयप्रती वितृष्णा बढिरहेको अवस्थामा यसलाई कार्यान्वयन गर्नका निम्ति लागिपर्ने बताएका छन् ।
निर्देशिका प्रदेश सरकारले स्वीकृत गरेको मितिबाट लागू हुनेछ ।
