असोज १३, पहिलो नेपाल – संघीय मामिला तथा सामान्य प्रशासन मन्त्री लालबाबु पण्डितले आफ्नो निर्वाचन क्षेत्रमा विभिन्न विकासका कार्यक्रमहरु अघि बढाईरहेका छन् । यसैलाई निरन्तरता दिँदै मन्त्री पण्डितले बिराटनगर वडा नं ७ मा अवस्थित आदर्श बालिका मा. बि लाई भवन निर्माणका लागि ४० लाख उपलब्ध गराएका छन् । संघीय मामिला तथा सामान्य प्रशासन मन्त्रालय अन्तर्गतको तराई मधेस समृद्धि कार्यक्रमबाट उक्त रकम विनियोजन गरिएको हो ।
यसैबीच मन्त्री पण्डितले असोज १२ गते निर्माण हुन लागेको भवनको शिलान्यास पनि गरेका छन् । ऐतिहासिक पृष्ठभुमि बोकेको आदर्श बालिका मा.बिको भवन जिर्ण अवस्थामा रहेको छ। शिलान्यासका क्रममा बोल्दै मन्त्री पण्डितले ऐतिहासिक विद्यालयलाई आफुले केही सहयोग गर्न पाउँद खुशी लागेको बताए। उनले तराई मधेस समृद्धि कार्यक्रम मार्फत धेरै विद्यालयहरुमा रकम उपलब्ध गराएको बताए ।
विद्यालयलाई रकम उपलब्ध गराउन मुख्य भुमिका खेलेका नेकपा जिल्ला सदस्य ओसिम आलमले चुनावका बेला आश्वासन मात्र बाँड्ने र विकासका लागि पछि हट्नेहरुले लालबाबु पण्डितबाट सिक्न आग्रह गरे । उनले आफ्नै क्षेत्रमा जिर्ण अवस्थामा रहेको विद्यालयलाई केही रकम उपलब्ध गराईदिनु भएकोमा मन्त्री पण्डितलाई धन्यवाद व्यक्त गरे । त्यस्तै , विद्यालय व्यवस्थापन समितिका अध्यक्ष जफर जमालीले भवन निर्माणका लागि ४० लाख रकम पनि ठुलो हुने भन्दै मन्त्री पण्डित र रकम उपलब्ध गराउन महत्वपूर्ण भुमिका खेल्ने ओसिम आलमलाई धन्यवाद व्यक्त गरे ।
