असोज १३, पहिलो नेपाल (बिराटनगर) – नेपाल प्रेस संगठन मोरङले ‘स्वर्गीय जनार्दन मैनाली स्मृति पत्रकारिता पुरस्कार’ पत्रकार इन्दिरा भट्टराईलाई प्रदान गरेको छ । सोमबार पत्रकार महासंघ मोरङको सभाहलमा एक कार्यक्रमका बिच पत्रकार भट्टराईलाई पुरस्कार वितरण गरिएको हो ।
बिभिन्न दैनिक र साप्ताहिक पत्रपत्रिकाहरुमा रिर्पोटिङ गरिसकेककी पत्रकार भट्टराई राससमा कार्यरत छिन् । उनी क्रियाशिल पत्रकार महिलाहरुको संस्था सञ्चारीका समुह प्रदेश १ को अध्यक्ष समेत हुन् ।
प्रेस चौतारी र प्रेस सेन्टर मोरङको आयोजनामा भएको कार्यक्रममा नगद १५ हजार रुपैयाँ सहित पत्रकार भट्टराईलाई पुरस्कार वितरण गरिएको हो । नेपाल सरकारका संघीय मामिला तथा सामान्य प्रशासन मन्त्री लालबाबु पण्डितले पुरस्कार वितरण गरेका हुन् । पुरस्कार वितरण कार्यक्रममा बोल्दै मन्त्री पण्डितले पछिल्लो समय अराजक पत्रकारिता मौलाउँदै गएकोप्रती दु:ख व्यक्त गरे । साथै उनले पत्रकारिता क्षेत्रको विकास भएपनि गुणस्तर र विश्वसनीयतामा भने कमी आउँदै गएको बताएका छन् ।
कार्यक्रममा नेपाल प्रेस संगठनका केन्द्रीय सदस्य लिलाराज भट्टराई, नेकपा मोरङका अध्यक्ष ऋषिकेश पोखरेल, नेपाल पत्रकार महासंघ प्रदेश १ का अध्यक्ष विक्रम लुइँटेललगायलते बोलेका थिए ।
स्वर्गीय जनार्दन मैनाली तात्कालिन समयमा एमाले सम्बद्ध बिभिन्न साप्ताहिक पत्रिकाहरु आवद्ध थिए । मैनालीको स्मृतिमा उनको परिवारले कोष स्थापना गरि पुरस्कार स्थापना गराएको हो ।
