असोज २३, पहिलो नेपाल – फिफा विश्वकप २०२२ को छनौट खेल अन्तर्गत आफ्नो तेस्रो खेलमा बिहिवार नेपालले बलियो प्रतिद्वन्दी अष्ट्रेलियासँग खेल्दैछ । खेल नेपालि समय अनुसार दिउँसो ३ बजे सुरु हुनेछ ।
अष्ट्रेलियाको राजधानी क्यानबेरामा हुने खेल नेपालका लागि जित भन्दा पनि अनुभव बटुल्ने र आफ्नो क्षमता जाँच गर्ने मौका हुनसक्छ ।
खेलअघि बुधबार आयोजित पत्रकार सम्मेलनमा नेपालका प्रशिक्षक योहान कालिनले अष्ट्रेलिया बलियो प्रतिद्वन्द्वी भएपनी आफ्नो टोलिले राम्रो खेल प्रस्तुत गर्नेमा विश्वस्त रहेको बताए । उता अष्ट्रेलियाका प्रशिक्षक ग्राहम आर्नोल्डले नेपालमाथि धेरै भन्दा धेरै गोल गर्ने लक्ष्य रहेको बताइरहँदा युरोपेली क्लब फुटबलका शीर्ष डिभिजनको लिगमा खेलिरहेका खेलाडीलाई रोक्न नेपाली टिमलाई हम्मेहम्मे पर्नेछ ।
अष्ट्रेलिया वरियताको ४४ औ स्थानमा छ भने नेपाल १६१ औं स्थानमा छ ।
पहिलो खेलमा कुवेतसँग ७-० गोलले पराजित भएको नेपालले दोस्रो खेलमा चाइनिज ताइपेईलाई २-० गोलले हराएको थियो। समूहमा जोर्डन पनि रहेको छ। प्रतियोगिता होम एन्ड अवे आधारमा हुने छ। समूहका शीर्ष दुई टोली तेस्रो चरणमा पुग्नेछन्।
