असोज ३०, पहिलो नेपाल – लाईभ इन्टरटेनमेन्टले आयोजना गर्न लागेको ‘बिराटनगर म्युजिक फेस्टिभल’ मा चर्चित गायक सबिन राई लगायतले प्रस्तुति दिने भएका छन् ।
तिहार लक्षित सांगीतिक धमाका कार्तिक ८ गते शुक्रवार बिराटनगरको जैन भवनमा आयोजना हुनेछ । कार्यक्रममा मुख्य आकर्षणको रुपमा सबिन राईलाई अनुबन्धित गरिएको कार्यक्रम व्यवस्थापक एवं संयोजक सन्तोष महत (सेन्ट्रो)ले जानकारी दिए । गायक सबिन राईले अन्य सात जनाको फारोह ब्यान्डको साथमा बिराटनगरका दर्शक तताउने छन् ।
कार्यक्रममा अन्य राष्ट्रिय तथा स्थानीय कलाकारले समेत दर्शक रुझाउने छन् । अन्य आकर्षणका रुपमा भ्वाईस अफ नेपाल सिजन वानमा दोश्रो भएका श्रीजे थपलिया र उनको प्लेग ब्याण्ड तथा नेपाल आईडल सिजन टु कि टप इलाभेन हिना मल्ल र उनको बदमाश ब्यान्ड लगायतको प्रस्तुती रहनेछ ।
साथै ग्रीन लिफ ब्याण्डले समेत प्रस्तुति दिने संयोजक महतले जानकारी दिए । उनका अनुसार सांगीतिक कार्यक्रममा स्थानिय कलाकारको प्रस्तुति र फुड ट्रक्स समेत हुनेछ।
कार्तिक ८ गते अपराह्न ३ बजे सुरु हुने कार्यक्रमको लागि १०० रुपैयाको टिकेट समेत राखिएको छ । कार्यक्रमको होस्ट पुजन थापा रहनेछिन् । ‘बिराटनगर म्युजिक फेस्टिबल २०७६’ पाँचौ संस्करण हो । यो हरेक वर्ष आयोजना गरिँदै आएको छ ।
