असोज ३०, पहिलो नेपाल – लायन्स क्लब अफ बिराटनगर सिटि र लियो क्लब अफ बिराटनगर सिटिले संयुक्त रुपमा निशुल्क आँखा शिविर सम्पन्न गरेको छ । कार्यक्रम मोरङको जहदा गाउँपालिका वडा नं २ स्थित मिलन चौकमा आयोजना भएको हो ।
बिहिवार आयोजना भएको कार्यक्रममा निशुल्क आँखा शिविरका साथसाथै अन्य चार कार्यक्रम पनि सम्पन्न गरेको छ । अन्य कार्यक्रमहरुमा निशुल्क मधुमेह जाँच, निशुल्क ब्लड प्रेसर जाँच, वातावरण स्वच्छता सम्बन्धि कार्यक्रम, तथा व्यक्तिगत सरसफाइ सम्बन्धि सचेतनामुलक कार्यक्रम गरेको लियो क्लब अफ बिराटनगर सिटिका अध्यक्ष दिलिप कुमार शाहले जानकारी दिए ।
उनका अनुसार ‘निशुल्क आँखा शिविरका लागि रामलाल गोल्छा अस्पतालले सहयोग गरेको थियो । शिविरमा १ सय २५ जनाले ओपिडि सेवा लिए भने १५ जनाको रामलाल गोल्छा अस्पतालले निशुल्क शल्यक्रिया गर्नेछ ।’ अन्यलाई निशुल्क रुपमा औसधि समेत वितरण गरेको अध्यक्ष शाहले बताए ।
,
त्यस्तै निशुल्क मधुमेह जाँच सन्जिवनी अस्पताल र आईभिएफ सेन्टर प्राइभेट लिमिटेडको सहयोगमा भएको हो । ब्लड प्रेसर जाँच भने दिलिप शाह र सुरज शाहले गरेका हुन् । वातावरण स्वच्छता र व्यक्तिगत सरसफाइ सम्बन्धि जनचेतना मुलक कार्यक्रमको नेतृत्व भने लियोका अन्य सदस्यहरुले गरेका थिए ।
कार्यक्रममा जम्मा ३ सय ६० जनाले सेवा लिएको समेत अध्यक्ष शाहले जानकारी दिए ।
कार्यक्रममा लायन्स क्लब अफ बिराटनगर सिटिका अध्यक्ष घनश्याम पोख्रेलको समेत उपस्थित थियो।
