कार्तिक ३, पहिलो नेपाल – नेपाल कम्युनिष्ट पार्टी (नेकपा) मोरङले दसैं, तिहार, छठ लगायतका चाडपर्वहरुको अवसरमा कार्तिक ८ गते शुक्रवार शुभकामना आदानप्रदान कार्यक्रमको आयोजना गर्ने भएको छ । कार्यक्रमलाई सम्बोधन गर्न नेकपाका अध्यक्ष पुष्पकमल दाहाल प्रचण्ड र रक्षामन्त्री ईश्वर पोखरेल आउने तय भएको छ ।
आईतवार बसेको नेकपा मोरङको बैठकले सो निर्णय गरेको हो । पार्टी एकता प्रकृयाका कारण लामो समयदेखि कार्यकर्ताहरु प्रशिक्षित हुन नपाइरहेको अवस्थामा शुभकामना आदनप्रदानकै सन्दर्भ पारेर राजनीतिक प्रशिक्षण समेत सञ्चालन गर्ने नेकपा मोरङको तयारी छ ।
चीनका राष्ट्रपति सी चिन फिङको नेपाल भ्रमण पछि राष्ट्रिय अन्तर्राष्ट्रिय राजनीतिक परिवेशमा आएको फेरबदल आदि विषयमा नेताहरुले प्रशिक्षण दिने नेकपा जिल्ला अध्यक्ष ऋषिकेश पोखरेलले बताए । शुभकामना आदनप्रदान कार्यक्रममा न्युनतम पाँच हजार कार्यकर्ताहरु सहभागी हुने बताइएको छ ।
कार्यक्रमको संयोजनका लागि बाबुराम कार्किको नेतृत्वमा समिति समेत गठन गरिएको छ ।
कार्यक्रमलाई भब्य बनाउन पार्टी कमिटी, जनवर्गीय संगठनहरु, पेशागत संगठनहरु, युवा विद्यार्थी सबैलाई आवश्यक भूमिकासहित परिचालन गर्ने पार्टीका मोरङ जिल्ला सहइन्चार्ज गोपि अछामीले बताए ।
