कार्तिक ४, पहिलो नेपाल – ग्लोबल स्टार नेपाली राष्ट्रिय क्रिकेट टिमका लेग स्पिनर सन्दीप लामिछानेले ‘द हन्ड्रेड’ क्रिकेट प्रतियोगिता पनि खेल्ने भएका छन् ।
आईतवार राति भएको ‘द हन्ड्रेड’ ड्राफ्टबाट सन्दीपलाई ओभल ईन्भिन्सिबल्सले अनुबन्धन गरेको छ । इंग्ल्याण्ड र वेल्समा आयोजना हुने यस प्रतियाेगिताका लागि ईन्भिन्सिबल्सले सन्दीपलाई १ लाख पाउण्ड (१ लाख २४ हजार डलर) अर्थात् १ करोड ४६ लाख नेपाली रुपैयाँमा अनुबन्ध गरेको हो ।
सन्दिप रहेको टिम ओभल इन्भिन्सिबल्समा जेसन रोए, सम करन, सुनिल नारायन, सेम बिलिङ्स जस्ता खेलाडी रहेका छन् ।
एक सय बलको हुने पहिलो संस्करणको द हन्ड्रेड प्रतियोगिता सन् २०२० को १७ जुलाइदेखि १६ अगस्टसम्म आयोजना हुनेछ । प्रतियाेगितामा ८ टिमकाे सहभागिता रहेकाे छ ।
याे सन्दीपकाे अहिलेसम्मकै उच्च मूल्य पनि हाे । सन्दीप केहिदिन अघि मात्र टी १० लिगका लागि कर्नाटका टसकसमा ४५ हजार डलरमा अनुबन्धन भएका थिए ।
