कार्तिक १०, पहिलो नेपाल – नेपाली लेगस्पिनर सन्दीप लामिछानेले अन्तर्राष्ट्रिय फ्रेन्चाइज लिगमा आफ्नो उचाइ निरन्तर अघि बढाइरहेका छन् । उनले आफ्नो उचाइ कहाँसम्म पुर्याउनेछन्, त्यो भविष्यलाई नै छोडौँ । १९ वर्षे यी नेपाली स्टारसँग अझै पर्याप्त समय छ । छोटो समयमा गरेको उल्लेख्य प्रगतिकै कारण विश्वचर्चित फ्रेन्चाइज लिगका अधिकांश ड्राफ्टमा उनी निर्विकल्प खेलाडीका रूपमा स्थापित भएका छन् ।
एकछिन कल्पना गरौँ, सन्दीपले यही रफ्तारमा १० वर्ष अन्तर्राष्ट्रिय फ्रेन्चाइज लिग खेलिरहे भने धनी खेलाडीको सूचीमा आफूलाई उभ्याउने पक्का छ । अहिले नै विश्व क्रिकेटको नजरमा उनी नछुट्ने खेलाडीका रूपमा स्थापित भइसकेका छन् । पछिल्लो दुई वर्षमै उनी नेपालका सर्वाधिक कमाउने खेलाडीमा दर्ज भइसकेका छन् । नेपालबाट विदेशी क्लबमा आबद्ध भएर सर्वाधिक कमाइ गर्ने खेलाडीमा उनी पहिलो नम्बरमा छन् । त्यसो त नेपालबाट भलिबल र फुटबलका खेलाडी पनि विदेशी क्लबमा अनुबन्ध नभएका होइनन् । तर, सन्दीपको तुलनामा उनीहरूको अनुबन्ध रकम निकै न्यून छ । छोटो समयमा विदेशी क्लबमा अनुबन्धन भएर करोडभन्दा बढी आर्जन गर्ने सन्दीप एक्ला नेपाली खेलाडी हुन् ।
सन्दीपले २०१८ र २०१९ मा विभिन्न अन्तर्राष्ट्रिय फ्रेन्चाइज लिगबाट कमाएको रकम यस्तो छ :
२०१८:
आईपिएल (भारत) – २० लाख भारु
क्लोबल टि-२० (क्यानडा) – ४० हजार डलर
क्यारेबियन प्रीमियर लिग (वेस्टईन्डिज) – ५ हजार डलर
अफगानिस्तान प्रीमियर लिग (अफगानिस्तान) – १५ हजार डलर
टि-१० लिग (युएई) – ३० हजार डलर
बिग ब्यास लिग (अष्ट्रेलिया ) – ६० हजार डलर
बाङ्लादेश प्रीमियर लिग (बाङ्लादेश ) ६० हजार डलर
पाकिस्तान सुपर लिग (पाकिस्तान ) – ५० हजार डलर
२०१९:
आईपिएल (भारत) – २० लाख भारु
क्यारेबियन प्रीमियर लिग (वेस्टइन्डिज) – ७० हजार डलर
टि-१० (युएई) – ४५ हजार डलर
द हन्ड्रेड (बेलायत) – एक लाख पाउन्ड
यसबाहेक सन्दिप बिगब्यास लिगमा पनि अनुबन्धित भैसकेका छन् तर उनको पारिश्रमिक खुलाईएको छैन् ।
सन्दीपले पछिल्लो २ वर्षमा विभिन्न अन्तर्राष्ट्रिय फ्रेन्चाइज लिगबाट मात्र नेपाली रुपैयाँ ६ करोडभन्दा धेर कमाएका छन् ।
१९ वर्षे सन्दीपले यही रफ्तारमा १० वर्ष अन्तर्राष्ट्रिय फ्रेन्चाइज लिग खेलिरहे भने धनी अन्तर्राष्ट्रिय खेलाडीको सूचीमा आफूलाई उभ्याउने पक्का छ ।
