कार्तिक २०, पहिलो नेपाल – भारतले लिपुलेक र कालापानीलााई आफ्नो नक्सामा समेटेको बिरोधमा सत्तारुढ नेकपा निकट विद्यार्थी संगठन अनेरास्ववियूले काठमाडौंमा प्रर्दशन गर्ने भएको छ । दिउँसो ३ बजे राजधानीको प्रर्दशनी मार्गस्थित रत्नराज्यलक्ष्मी क्याम्पसबाट बिरोध प्रदर्शन आरम्भ गर्ने अनेरास्ववियुका एक नेताले बताए ।
‘आफ्नो मातृभूमि माथिको आक्रमण टुलुटुलु हेरेर बस्न सकिँदैन र यो बिषयमा सम्पुर्ण नेपालीहरु एकजुट हुनुपर्छ।’ अनेरास्ववियूका एक नेताले भने। भारतले शनिबार सार्वजनिक गरेको नयाँ नक्सामा कालापानी लिपुलेकलाई समेत सामेल गरेको छ । नेपाली भूभागलाई आफ्नो भनि दावी गर्ने भारतीय विस्तारवादका विरुद्ध शसक्त आन्दोलन गर्ने पनि उनले बताए ।
अनेरास्वयूले लिपुलेक,कालापानी र लिम्लियाधुरा प्रकरणमा सरकारको धारणा समेत माग गरेको छ ।
दार्चुला जिल्लाको लिपुलेक, लिम्पियाधुरा र कालापानी क्षेत्रलाई भारतले गएको शनिबार सार्वजनिक गरेको आफ्नो राजनीतिक नक्सामा समेटेको छ । यसअघि पनि यो क्षेत्र आफ्नो भन्दै भारतले दाबी गर्दै आएको थियो । जम्मू–कश्मीर औपचारिक रूपमा दुईवटा केन्द्रशासित राज्यमा विभाजित भएसँगै नरेन्द्र मोदी नेतृत्वको सरकारले भारतको नयाँ नक्सा सार्वजनिक गर्ने क्रममा नेपालको लिपुलेक, लिम्पियाधुरा र कालापानी क्षेत्रलाई आफ्नो नक्सामा समावेश गरेको हो । भारतले सार्वजनिक गरेको नक्साअनुसार कालापानी क्षेत्रको मात्रै ६२ वर्ग किलोमिटर क्षेत्र परेको छ । यस्तै लिपुलेकबाट आएको नदीदेखि लिम्पियाधुरातर्फबाट आएको नदी क्षेत्रको झण्डै ३१० वर्ग किलोमिटर क्षेत्र पनि नक्साभित्र समेटेको छ ।
