कार्तिक २०, पहिलो नेपाल – अनेरास्ववियुका प्रभावसाली नेता ओसिम आलमले आफ्नो मातृभूमि माथिको आक्रमण टुलुटुलु हेरेर बस्न नसकिने बताएका छन् । भारतले लिपुलेक र कालापानीलाई आफ्नो नक्सामा समेटेकोप्रती उनले सम्पुर्ण नेपालीलाई एकजुट भएर त्यसको बिरुद्धमा लाग्न आग्रह गरे ।
आलमले भने,‘आफ्नो मातृभूमि माथिको आक्रमण टुलुटुलु हेरेर बस्न सकिँदैन र यो बिषयमा सम्पुर्ण नेपालीहरु एकजुट हुनुपर्छ।
यो रास्ट्र र नेपाली माथिको आक्रमण हो । हाम्रो लिपुलेक , लिम्पियाधुरा र कालापानीको विषय नेपालको अखण्डतामा आक्रमण हो। तत्काल सरकारले पहलकदमी लिनुपर्छ र भारतले गल्ती सच्याई माफी माग्नुपर्छ ।’ यसका साथै कुनै पार्टी , कुनै धर्म, कुनै जाति वा कुनै भूगोलमा विभाजित नभई सम्पुर्ण नेपालीहरु एकजुट भएर भारतको दादागिरी बिरुद्ध सशक्त आन्दोलन गर्नुपर्ने उनको धारणा छ ।
भारतले शनिबार सार्वजनिक गरेको नयाँ नक्सामा कालापानी, लिपुलेक र लिम्पियाधुरालाई समेत सामेल गरेको छ । नेपाली भूभागलाई आफ्नो भनि दावी गर्ने भारतीय विस्तारवादका विरुद्ध शसक्त आन्दोलन गर्न सबै नेपाली एकजुट हुनुपर्ने आलमले बताए ।
नेता आलमले लिपुलेक,कालापानी र लिम्पियाधुरा प्रकरणमा नेपाल सरकार भारतको कुनैपनी दबाव र प्रभावमा पर्न नहुने बताए । यसका लागि सरकारलाई झक्झकाउन र कुनैपनी दबावमा पर्न नदिनका लागि खबरदारी समेत गर्नुपर्ने उनको भनाई छ ।
साथै नेता आलमले अनेरास्ववियूले यसअघि पनि राष्ट्रियता, भौगोलिक अखण्डताको पक्षमा आवाज उठाईरहेको र सँधै उठाईरहने उल्लेख गरे । उनले अनेरास्ववियूले भारतको यो दादागिरी बिरुद्ध आन्दोलन सुरु गरिसकेको समेत बताए ।
दार्चुला जिल्लाको लिपुलेक, लिम्पियाधुरा र कालापानी क्षेत्रलाई भारतले गएको शनिबार सार्वजनिक गरेको आफ्नो राजनीतिक नक्सामा समेटेको छ । यसअघि पनि यो क्षेत्र आफ्नो भन्दै भारतले दाबी गर्दै आएको थियो । जम्मू–कश्मीर औपचारिक रूपमा दुईवटा केन्द्रशासित राज्यमा विभाजित भएसँगै नरेन्द्र मोदी नेतृत्वको सरकारले भारतको नयाँ नक्सा सार्वजनिक गर्ने क्रममा नेपालको लिपुलेक, लिम्पियाधुरा र कालापानी क्षेत्रलाई आफ्नो नक्सामा समावेश गरेको हो । भारतले सार्वजनिक गरेको नक्साअनुसार कालापानी क्षेत्रको मात्रै ६२ वर्ग किलोमिटर क्षेत्र परेको छ । यस्तै लिपुलेकबाट आएको नदीदेखि लिम्पियाधुरातर्फबाट आएको नदी क्षेत्रको झण्डै ३१० वर्ग किलोमिटर क्षेत्र पनि नक्साभित्र समेटेको छ ।
