कार्तिक २१, पहिलो नेपाल – एक महिना अघि बिराटनगरमा खुलेको रोयल बिर्यानी हाउसको अहिले चर्चा हुन थालेको छ । बिराटनगरको ट्राफिक चौकमा दुई युवाले खोलेको बिर्यानी हाउसमा छोटो समयमा नै ग्राहकको चाप अत्याधिक बढ्न थालेपछि यसको चर्चा सुरु भएको हो ।
साउदी अरबमा १५ वर्ष कुक काम गरेर आफ्नै देश फर्किएका आमिर अन्सारी र कोबास कलेजका डाईरेक्टर पप्पु अन्सारीद्वारा संयुक्त रुपमा संचालित उक्त रोयल बिर्यानी हाउसले सय रुपैयाँमा नै धेरै र स्वादिष्ट बिर्यानी दिन थालेपछि ग्राहकहरुको चाप बढ्न थालेको हो ।
बिर्यानी हाउसका संचालक पप्पु अन्सारीले अरुतिर तीनचार सय पर्ने बिर्यानी त्यहाँ सय रुपैयामा मात्र पर्ने धेरै अनि स्वादिष्ट भएकोले ग्राहकहरुको चाप बढेको बताए । उनले भने, ‘हामिले कुनै प्रचार प्रसार पनि गरेका छैनौं, जम्मा एक महिना हुन लाग्यो संचालनमा ल्याएको तर ग्राहकहरु टाढाटाढा बाट खोज्दै आउनुहुन्छ। यति चर्चा कमाउँछ भनेर सोचेको पनि थिएनौँ।’
दिनमा अनुमानित दुई सय ग्राहक बिर्यानी खानकै लागि आउने गरेको र घरबाट पनि प्रतिदिन सय प्लेट जति अर्डर हुने गरेको अन्सारीले सुनाए ।
सुरुवातमा पाँच लाख लगानीमा सुरु गरिएको बिर्यानी हाउसलाई बिस्तारै अन्य ठाउमा समेत लैजाने अन्सारीले बताए । उनका अनुसर चाँडै बिराटनगरको सेन्ट्रल महलमा पनि बिर्यानी हाउस सुरु गर्न लागिएको छ ।
रोयल बिर्यानी हाउसमा चिकेन, मटन लगायतका ताजा बिर्यानी उपलब्ध हुने गरेको अन्सारीले बताए ।
