कार्तिक २२, पहिलो नेपाल – प्रदेश नं. १ का दुई सय वटा सामुदायिक विद्यालयलाई प्रविधिमैत्री बनाउँदै गुणस्तर युक्त विद्यालय बनाईने भएको छ । गत भदौ २२ गते प्रदेश नं. १ सरकारले ‘सामुदायिक विद्यालय शैक्षिक गुणस्तर सुधार’ अभियानको सुरुवात गरेलछी पहिलो चरणमा चालु आर्थिक वर्ष २०७६/०७७ भित्रमा प्रदेशभरीका ६४ स्थानीय तहका दुई सय विद्यालयलाई प्रविधिमैत्री बनाउन लागिएको हो ।
पहिलो चरणमा छनौट भएका ६४ स्थानीय तहका प्रमुख/उपप्रमुख, एक सय विद्यालयका प्रधानाध्यापक र विद्यालय व्यवस्थापन समितिका अध्यक्षहरुलाई शुक्रबार विराटनगरमा अभिमुखीकरण दिईएको छ ।
अभिमुखीकरण कार्यक्रममा मुख्यमन्त्री शेरधन राईले विद्यालय शिक्षाको शैक्षिक गुणस्तर सुधार अभियानका रुपमा प्रदेश सरकारले नेपालमै पहिलो पटक कार्यक्रम शुरु गरेको बताउनुभयो । प्रदेश सरकारले प्राविधिक धारको शिक्षामा विशेष जोड दिएका कारण डिजिटल साक्षरता शुरु गरेको उहाँले बताउनुभयो । उहाँले कार्यक्रमको सफल प्रयोग पछि देशैभरि अभियान पुग्ने उहाँको दावी छ ।
त्यस्तै ,सामाजिक विकास मन्त्री जीवन घिमिरेले डिजिटल प्रदेशको आधारभुमी विद्यालय भएकाले विद्यालयवाट अभियान शुरु गरिएको बताउनुभयो ।
प्रदेशका ७ हजार विद्यालयलाई प्रविधिमैत्री बनाउने अभियान अनुसार पहिलो चरणमा १ सय विद्यालय छनौट गरिएको उहाँले बताउनुभयो । उहाँका अनुसार अन्य १ सय विद्यालयमा आगामी मंसिर १ गतेदेखि अभियान शुरु हुनेछ ।’ दोश्रो चरणको अभियान संखुवासभाको मादीबाट शुरु हुने मन्त्री घिमिरेले बताउनुभयो ।
अभिमुखीकरण कार्यक्रममा राष्ट्रिय आविस्कार केन्द्रका अध्यक्ष डा.महावीर पुन, सूचना प्रविधि विज्ञ सुदीप कार्की, डा. दोभान राई, डा. ऋषि शाहले सूचना प्रविधि संवन्धि प्रशिक्षण दिनुभएको थियो ।
प्रविधि मैत्री विद्यालय बनाउने अभियानमा प्रदेश सरकारसँग इक्वालिटी फाउण्डेसनले सहकार्य गरेको छ ।
