मंसिर ३, पहिलो नेपाल – प्रदेश नं. १ सरकारले सुरुवात गरेको ‘सामुदायिक विद्यालय शैक्षिक गुणस्तर सुधार’ अभियान अन्तर्गत दोश्रो चरणको अभियान सुरु भएको छ । सोमबार संखुवासभाको मादी माध्यमिक विद्यालय र मुडेको सिंहेश्वरी माध्यममिक विद्यालयबाट औपचारिक रुपमा यसको सुरुवात भएको हो । अभियानको सुरुवात प्रदेश नं. १ का सामाजिक विकास मन्त्री जीवन घिमिरेले गरेका थिए ।
प्रदेश नं. १ सामाजिक विकास मन्त्रालय र युनाइटेड वल्ड स्कुल्स नेपालबिचको सहकार्यमा डिजिटल साक्षरता कार्यक्रम तथा कम्प्युटर ल्याबको उद्घाटन गर्दै प्रविधी मैत्री र गुणस्तरीय सामुदायिक विद्यालय बनाउने अभियानको सुरुवात भएको हो ।
प्रदेस नं. १ सामाजिक विकास मन्त्रालय द्वारा प्रदेशभरका सामुदायिक विद्यालयलाई प्रविधि मैत्री बनाउने भन्दै अभियानको सुरुवात गरेको हो । गत भदौ २२ गते ‘सामुदायिक विद्यालय शैक्षिक गुणस्तर सुधार’ अभियानको सुरुवात गरेपछी पहिलो चरणमा प्रदेशभरीका ६४ स्थानीय तहका दुई सय विद्यालयलाई प्रविधि मैत्री बनाउने कार्य भैरहेको छ ।
अभियानको दोश्रो चरणमा प्रदेशभरका एक सय सामुदायिक विद्यालयलाई प्रविधिमैत्री बनाईन लागिएको अभियानका सदस्य ओसिम आलमले जानकारी दिए ।
प्रदेशका ७ हजार विद्यालयलाई प्रविधिमैत्री बनाउने अभियान अनुसार पहिलो चरणमा १ सय विद्यालय छनौट गरिएको थियो भने दोश्रो चरणमा अन्य १ सय विद्यालयको छनौट गरिएको छ ।
