मंसिर ३, पहिलो नेपाल – सत्तारुढ नेपाल कम्युनिष्ट पार्टी (नेकपा) को युवा संगठन राष्ट्रिय युवा संघका नेताहरु तीन महिनाभन्दा बढी बेरोजगार बस्न नपाउने भएका छन् ।
युवा संघ र वाइसीएलबीच भएको एकतापछिको पहिलो राष्ट्रियभेलाले सक्रिय तथा साधारण सदस्य र एकाई कमिटिका सदस्यहरुबाहेक अरु नेता तीन महिनाभन्दा बढी बेरोजगार बस्न नपाउने निर्णय गरेको हो । संगठनको सदस्य भएको तीन महिनाभित्र स्वरोजगार भइसक्नुपर्नेछ ।
त्यस्तै आफ्नो जमिन भएको नेता, कार्यकर्ता भए आफ्नै जमिनमा र जमिन नभएर भाडामा बसोबास गर्ने भए बरण्डा तथा सम्भावित खालि स्थानमा अनिवार्य करेसाबारी बनाउनुपर्ने पनि भेलाले निर्णय गरेको छ ।
सरकारसंग १० किलोमिटर सडक माग्ने,
राष्ट्रिय युवा संघले सामाजिक उत्तरादायित्व र जनसेवा तथा जनश्रम अन्तर्गत सरकारसंग यो वर्ष १० किलोमिटर सडक निर्माणको कार्यभार माग गर्ने समेत निर्णय गरेको छ ।
‘त्यस्तो निर्माण कार्यमा हाम्रो संघको श्रमिदान मात्रै हुनेछ’ संगठनको विज्ञप्तीमा भनिएको छ ।
संघले प्रत्येक कमिटिले कम्तिमा १/१ वटा विकास निर्माणका काम अनिवार्य गर्नुपर्ने र संघको कुनैपनि सदस्यले महिनामा एक दिन अनिवार्य रुपमा श्रमकार्य गर्नुपर्ने पनि जनाएको छ ।
तीन महिनामा एउटा निःशुल्क तालिम
संघका सबै तहका कमिटीहरुले तीन महिनामा एकपटक र सदस्यहरुले अवस्थाअनुसार ट्युसन सेण्टर, कृषि तालिम लगायतका तालिमहरु निःशुल्क रुपमा सञ्चालन गर्नुपर्ने पनि संघगठनले निर्णय गरेको छ ।
संगठन जनतासँग जाेडिएकाे प्रत्याभूति दिलाउन र कामकाे सम्मानका लागि यस्ताे व्यवस्था गरिएकाे संगठनले जनाएकाे छ ।
त्यस्तै भेलाले राष्ट्रिय युवा संघको ७ बुँदे राष्ट्रिय तथा अन्तरास्ट्रिय प्रस्तावहरु समेत पारित गरेको छ । जसअन्तर्गत भारतले नेपालका विभिन्न क्षेत्रमा गरिरहेको सीमा अतिक्रमणको घोर विरोध गर्दै, कालापानी, लिम्पियाधुरा, लिपुलेक, सुस्ता लगायतका अतिक्रमित भुभाग अविलम्ब फिर्ता गर्न र अतिक्रमित क्षेत्रबाट भारतीय सेना हटाउन युवा संघले माग गरेको छ ।
त्यस्तै वर्तमान सरकारले राष्ट्रियताका सवालमा सर्वपक्षीय बैठक र छलफलको आयोजना गरि राष्ट्रिय सहमति जुटाएकोमा खुसी व्यक्त गर्दै सरकारलाई आवश्यक रचनात्मक सहयोग गर्ने प्रस्ताव पारित गरेको छ ।
युवा संघको बैठकले, छिमेकी राष्ट्र चीन र बङ्गलादेशका राष्ट्रपति द्वारा भरखरै नेपालमा भएको भ्रमणले दुई देशको आपसी सम्बन्धलाई अझ प्रगाढ बनाएको ठहर गर्दै भ्रमणले विकासका कार्यमा साझेदारी गर्दै अगाडी बढने अवसर श्रृजना भएको निश्कर्ष निकालेको छ ।
त्यसैगरी आगामी मंसिर १४ गते हुने उपनिर्वाचनमा नेकपाका उमेद्वारहरुलाइ विजयी बनाउन मतदाताहरुमा हार्दिक आहृान गर्दै संघका नेता कार्यकर्तालाई चुनावी अभियानमा सक्रियतापुर्वक लाग्न निर्देशन गर्ने निर्णय गरेको छ ।
युवासंघले रौतहट बम काण्डलाई निन्दनीय भन्दै घट्नामा घाईते भएकाहरुलाई जिउँदै ईटा भट्टामा जलाउनु अमानवीय र बर्बर युगलाई विर्साउने भएको निश्कर्ष निकालेको छ । त्यस्तै उक्त प्रकरणमा दोषीलाई हदै सम्मको कार्वाही गर्न र रौतहटमा रहेको त्रासको वातावरणलाई शान्तिपुर्ण बनाउन र त्रसित जनतालार्ई सुरक्षा दिन सरकारसँग अनुरोध गरेको छ ।
