मंसिर ७, पहिलो नेपाल – विराटनगर पूर्वमा रहेको सिंघिया खोला संरक्षण तथा सरसफाइ अभियान शुरु भएको छ । शुक्रबार बिराटनगर स्थित उद्योग संगठन मोरङको सभाहलमा ‘सिँघिया नदि संरक्षण तथा सफाई अभियान २०७६’ विषयमा अन्तरक्रिया गरिएसँगै अभियान शुरु भएको हो ।
अन्तरक्रिया कार्यक्रममा प्रदेश नम्बर १ का सामाजिक विकास मन्त्री जीवन घिमिरेले सिंघिया खोलाको अस्तित्व संकटमा परेकाले सबैले यसको अस्तित्व बचाउन लाग्नु पर्नेमा जोड दिए । उनले सिघिया नदी वातावरणीय दृष्टिकोणले चुनौतीको रुपमा देखा परेसँगै यसको संरक्षण र सम्बद्र्धनमा सबै जुटनु पर्नेमा जोड दिए ।
प्रदेश नम्बर १ सामाजिक विकास मन्त्रालयको मुख्य संयोजन तथा बिराटनगर महानगरपालिकाको सह-संयोजनमा भएको अन्तरक्रियामा विराटनगर महानगरपालिकाका प्रमुख प्रशासकीय अधिकृत एकदेव अधिकारीले सिंघिया संरक्षण तथा सफाइ अभियान सम्बन्धी कार्यपत्र प्रस्तुत गर्दै संरक्षणका लागि तटबन्धन निर्माण गर्नुपर्ने तथा फोहर मुक्त बनाउनु पर्नेमा जोड दिए ।
विराटनगरको घिनाघाटदेखि दक्षिण भाथिगछसम्मको १० किलोमिटरलाई पहिलो चरणमा नमुनाको रुपमा अभियान शुरु गर्ने तयारी रहेको छ । जसमा खोलाको नाप तथा नक्साङ्कन, अतिक्रमित जग्गा खाली गर्ने, खाली जग्गाहरुमा बृक्षरोपण गर्ने तयारी पनि सिँघिया खोला सरसफाई अभियानको क्रममा हुने जानकारी दिईएको छ । सिँगिया खोलाको हात्तिमुडादेखि घिनाघाटसम्मको १२ किलोमिटर, घिनाघाटदेखि दक्षिण भाथिगछसम्मको १० किलोमिटर र भाथिगछदेखि नेपाल भारत सिमा क्षेत्रसम्मको १० किलोमिटरलाई फरक फरक क्लष्टर विभाजन गरि काम गर्ने प्रदेश सरकारको योजना रहेको छ । त्यसका लागि बुढीगंगा गाउँपालिका, ग्रामथान गाउँपालिका, कटहरी गाउँपलिका, जहदा गाउँपालिका र बिराटनगर महानगरपालिका एकै ठाउँमा बसेर योजना निर्माण गरी अघि बढ्नु पर्ने देखिएको छ ।
कार्यक्रममा बिराटनगरका विभिन्न उद्योगि, राजनैतिक दलका प्रतिनिधि , सामाजिक अभियन्ता तथा स्थानियहरुको उपस्थिति रहेको थियो ।
