मंसिर ७, पहिलो नेपाल – बिराटनगरको हाटखोलामा रहेको आरोहण गुरुकुलले ‘काव्यारोहण’ नाम दिँदै आरोहण कविता यात्राको सुरुवात गरेको छ । मंसिर ७ गते शुक्रबारबाट सुरु भएको काव्य शृङ्खलाको पहिलो भागमा वरिष्ठ कवि बैरागी काईँलाले कविता वाचन गरेका छन् ।
शृङ्खलाको पहिलो भागमा वरिष्ठ कवि बैरागी काईँलाले पाँचवटा कविता वाचन गरेका छन् । कार्यक्रममा विराटनगर महानगरपालिकाका मेयर भिम पराजुली , राष्ट्रसभा सांसद खेम नेपाली लगायतको उपस्थिति रहेको थियो।
प्रत्येक महिनाको पहिलो सनिवार हुने कार्यक्रममा ख्यातिप्राप्त नेपाली कविहरुको एकल कविता वाचन हुने आयोजकले जानकारी दिएको छ । आरोहण गुरुकुलले सुरुवात गरेको साहित्यक शृङ्खलामा बिराटनगर महानगरपालिका प्रवर्द्धकको रुपमा रहेको छ ।
लामो समयदेखि रङ्गमञ्च तथा कला साहित्यको विविध क्षेत्रमा काम गर्दै आएको आरोहण गुरुकुलले ‘काव्यारोहरण’ मार्फत विभिन्न स्रष्टा तथा सर्जकहरुको एकल कविता वाचन गराउने कार्यक्रम संयोजनका सदस्य रमेश चन्द्र अधिकारीले बताएका छन् । आम नागरिकमा उत्कृष्ट कविताहरुको प्रत्यक्ष रसास्वादन गराई नेपाली कविताको प्रवर्द्धन हुने अपेक्षा अनुरुप कार्यक्रमको सुरुवात गरेको अधिकारीले जानकारी दिए ।
