पुस १५, पहिलो नेपाल – प्रदेश १ सरकारले नेपाल भ्रमण वर्ष २०२० को शुभारम्भका लागि सम्पूर्ण तयारी पूरा भएको जनाएको छ । उद्योग, पर्यटन, वन तथा वातावरण मन्त्रालयले बुधबार अर्थात् जनवरी १ का बिराटनगर स्थित सहिद रंगशालामा भ्रमण वर्षको शुभारम्भ गर्ने कार्यक्रम छ ।
उद्योग, पर्यटन, वन तथा वातावरण मन्त्रालयका अनुसार बिहान ११ बजेबाट विभिन्न समुदायका झाँकीसहितको र्याली सहिद रंगशालामा प्रवेश गर्नेछ। उद्घाटन समारोहमा प्रदेश नम्बर १ का सबै जिल्लाको सांस्कृतिक पहिचान झल्किने प्रस्तुति देखाइनेछ । मन्त्रालयद्वारा आयोजित प्रदेश १ भ्रमण वर्ष २०२० को शुभारम्भ मुख्यमन्त्री शेरधन राईले गर्ने कार्यक्रम छ ।
उद्घाटन समारोहमा प्रदेशका प्रमुख पर्यटकीय गन्तव्यहरुका पोष्टर, तस्वीर प्रदर्शनीका साथै प्रदेशको संस्कृति झल्किने झाँकीसमेत प्रस्तुत गरिनेछ । कार्यक्रममा भ्रमण वर्षलाई लक्षित गरी मन्त्रालयले बनाएको लोगो र नारालाई सार्वजनिक गरिनेछ । कार्यक्रममा प्रदेशका पर्यटकीय क्षेत्रहरु झल्किने वृत्तचित्र समेत प्रस्तुत गरिनेछ। त्यसबाहेक विभिन्न सांस्कृतिक कार्यक्रम पनि हुनेछ ।
प्रदेश सरकारका उद्योग, पर्यटन, वन तथा वातावरणमन्त्री जगदीशप्रसाद कुशियतले भ्रमण वर्षलाई सबैले साझा अभियानका रूपमा लिनुपर्ने बताउँदै आएका छन् । उद्घाटन समारोहमा सहभागीताका लागि प्रदेशका सबै जिल्ला समन्वय समिति, स्थानीय तहलाई पत्राचार गरिएको छ । उद्घाटन कार्यक्रममा प्रदेशका करिब दस हजार मानिस सहभागी हुने समेत अनुमान गरिएको छ ।
