पुस १८, पहिलो नेपाल – दक्षिण अफ्रिकाका पुर्व टेस्ट कप्तान तथा ओपनिङ्ग ब्याट्सम्यान हसिम आमला आगामी चैतमा टियु क्रिकेट मैदानमा आयोजना हुने एभरेस्ट प्रिमिएर लिग खेल्ने भएका छन् ।
चौका मेसिनको नामले परिचीत अंमला ईपिएल खेल्न नेपाल आउने पक्का भएको हो । उनी कुन टोलीबाट खेल्ने भन्ने अझै टुंगो भने लागि सकेको छैन । दक्षिण अफ्रिकी खेलाडी नै भित्र्याउने क्रममा गत बर्ष पोखरा राइनोजले रिचार्ड लेभिलाई खेलाएको थियो ।
३६ बर्षिय आमलाले दक्षिण अफ्रिकाको लागि १२४ टेस्ट, १ सय ८१ एकदिवसीय र ४४ ट्वान्टी ट्वान्टी अन्तराष्ट्रिय खेलेका थिए । सन् २०१४ बाट सन् २०१६ सम्म दक्षिण अफ्रिकाको टेस्ट कप्तान रहेका उनले टेस्टमा ४६ दशमलब ६४ को औसतमा कुल ९ं हजार २ सय ८२ रन बनाएका थिए । उनले टेस्टमा २८ शतक तथा ४१ अर्धशतक आफ्नो नाममा लेखाएका थिए ।
त्यस्तै १८१ एकदिवसीय खेलमा आमलाले ४९ दशमलब ४६ को औसतमा ८ हजार १ सय १३ रन बनाएका थिए भने २७ शतक र ३९ अर्धशतक प्रहार गरेका थिए । ४४ ट्वान्टी ट्वान्टी अन्तराष्ट्रिय खेलेका उनले १२ सय ७७ रन बनाएका थिए भने आठ अर्धशतक प्रहार गरेका थिए ।
आमलाले इण्डियन प्रिमिएर लिगमा किंग्स ११ पन्जाबबाट खेलेका थिए । सन् २०१६ र सन् २०१७ को संस्करण खेलेका आमलाले कुल १६ खेल खेलेका थिए । पहिलो सिजनमा छ खेल खेलेका उनले एक अर्धशतक सहित १५७ रन बनाएका थिए भने दोश्रो सिजनमा समान २–२ शतक र अर्धशतक सहित १० पारीमा ४२० रन बनाएका थिए ।
