पुस २०, पहिलो नेपाल – नेपाली लेग स्पिनर सन्दीप लामिछानेले २०२० को शानदार सुरुवात गरेका छन् । जारी अस्ट्रेलियाको विग–बास क्रिकेट लिगमा मेलबर्न स्टार्सबाट खेलिरहेका नेपाली युवा बलर सन्दीप लामिछानेले सहरिया प्रतिद्वन्द्वी मेलबर्न रेनेगेट्ससँगको खेलमा ३ विकेट लिँदै २०२० लाई स्वागत गरेका छन् ।
२०१९ मा टि-२० अन्तर्राष्ट्रियमा सबैभन्दा धेरै विकेट लिने खेलाडीको सुचिमा विश्वकै पहिलो नम्बरमा रहेका सन्दीपले २०२० को पहिलो खेलमा पनि उत्कृष्ट बलिङ गर्दै ३ विकेट लिएका हुन्। विग-बास लिग अन्तर्गत शनिबार भएको मेल्बर्न डर्बी भिडन्तमा टस जितेर ब्याटिङ गरेको घरेलु टोली रेनेगेट्सविरुद्ध सन्दीपले ४ ओभरमा २६ रन खर्चिए । सातौं र नवौं ओभर बलिङ गरेका सन्दीपले विकेट लिन सकेनन् । क्रमशः ७ र १२ रन खर्चिए । १४ ओभरसम्म रेनेगेट्स २ विकेट क्षतिमा १ सय १५ रन बनाएर ठूलो स्कोरतर्फ लक्षित थियो ।
यस्तोमा बलिङको जिम्मा पाएका सन्दीपले १५ औं ओभरमा २ विकेट झारे । ओभरको तेस्रो बलमा उनले क्रिजमा टिकिरहेका शन मार्सलाई नाथान कल्टर नाइलको हातबाट क्याचआउट गराए । मार्सले ३३ बलमा ४३ रन बनाएर खेलिरहेका थिए । सन्दीपले पाँचौं बलमा डानियल क्रिस्टियनको स्टम्प उडाइदिए । क्रिस्टियन गोल्डेन डकआउट भए । सन्दीपले यो ओभरमा ४ रनमात्र खर्चिएका थिए ।
१७ औं ओभरमा आफ्नो अन्तिम स्पेल बलिङ गरेका सन्दीपले टस कुपरलाई पनि एलबीडब्लू धरापमा पारे । सन्दीपले ५ खेलमा आफ्नो विकेटसंख्या ६ पुर्याएका छन् । सो खेल स्टार्सले जित्दै तालिकाको शिर्ष स्थानमा रहेको छ।
गतवर्ष पनि मेलबर्न स्टारबाट नै खेलेका सन्दिपले ८ खेलमा ११ विकेट लिँदै आफ्नो टिमलाई फाईनल सम्म पुर्याएका थिए। यसवर्ष पनि सन्दिपको टिम तालिकाको शिर्ष स्थानमा रहेको छ ।
