पुस २१, पहिलो नेपाल – विराटनगर र कटहरी गाउँपालिका जोड्ने सिंघिया खोलाको पुलमा परेको प्वाल टाल्न सामाजिक विकास मन्त्री जीवन घिमिरेले निर्देशन दिएका छन् । सडक डिभिजन कार्यालय विराटनगरका प्रमुखलाई मन्त्रालयमा बोलाएर मन्त्री घिमिरेले अनुरोध पत्र समेत थमाएका छन् ।
सोमबार डिभिजन कार्यालयका निमित्त प्रमुख इन्जिनियर नितेश झालाई कार्यकक्षामा बोलाएर विराटनगर र कटहरी गाउँपालिकालाई जोड्ने सिंघिया खोलाको पुल मर्मतको लागि सहयोग गर्न मन्त्री घिमिरेले अनुरोध गरेका हुन् ।
मन्त्री घिमिरेले हस्ताक्षर गरेको पत्रमा ‘समयमै पुल मर्मत नगरे ठुलो धनजनको क्षति हुने भन्दै मर्मत गरी सहयोग गरिदिनु हुन अनुरोध छ ।’ उल्लेख गरिएको छ ।
मन्त्री घिमिरेसँगको भेटमा कार्यालय निमित्तप्रमुख इन्जिनियर झाले भोलीदेखि नै काम सुरु गर्ने प्रतिबद्धता जनाएका छन् ।
यसअघि अनेरास्ववियुका नेता विकास महतोले उक्त पुल जिर्ण रहेको बताउँदै सरकार र सम्बन्धित निकायलाई ध्यानाकर्षण गराउँदै बोलेको एउटा भिडियो सामाजिक सन्जालमा भाईरल भएको थियो। सो भिडियो भाईरल भएको केही समयपछी नै मन्त्री घिमिरेले उक्त समस्या समाधान गर्न निर्देशन दिएका हुन्।
