पुस २४, पहिलो नेपाल – सरकारले पश्चिम एसियामा भएका पछिल्ला घटनाक्रमलाई गम्भीर चासोका साथ हेरिरहेको जनाएको छ।
परराष्ट्र मन्त्रालयले बिहीबार एक विज्ञप्ति जारी गर्दै इरान र अमेरिकाबीच बढ्दो तनावप्रति गम्भीर चासो व्यक्त गरेको हो।
‘पश्चिम एसिया क्षेत्रमा भएका पछिल्ला घटनाक्रमलाई नेपाल सरकारले गम्भीर चासोका साथ हेरिरहेको छ,’ परराष्ट्र मन्त्रालयद्वारा जारी विज्ञप्तिमा उल्लेख छ, ‘उक्त क्षेत्रमा ठूलो सङ्ख्यामा नेपाली कामदार रहेका छन्। यसकारण हाम्रा जनताको सुरक्षा हाम्रो लागि सर्वोच्च प्राथमिकताको विषय हो।’
विज्ञप्तिमा सबै पक्षलाई संयम हुन आग्रह गरिएको छ। नेपालले संवादमार्फत समस्याको समाधान खोज्न पनि भनेको छ। पश्चिम एसिया क्षेत्रको शान्ति र स्थिरतामा दखल पुग्ने कुनै पनि कार्य नगर्नसमेत नेपालले आग्रह गरेको छ।
शान्तिपूर्ण तरिकाले कुनै पनि समस्या र मतभेदको समाधान खोज्नुपर्छ भन्ने नेपालको सिद्धान्त रहेको विज्ञप्तिमा जनाइएको छ।
