पुस २६, पहिलो नेपाल – महेन्द्र मोरङ क्याम्पसमा अध्ययनरत विद्यार्थी कौशल देव क्यान्सर रोगबाट ग्रसित भएपछि उनलाई बचाउन विराटनगरका बिद्यार्थीले अभियान चलाईरहेका छन् । बिएसी बायोलोजी तेस्रो वर्षमा अध्ययनरत आफुजस्तै विद्यार्थीलाई क्यान्सर रोग लागेपछि उपचार गराउन साथीहरु आर्थिक संकलनमा जुटेका हुन् ।
राजविराज घर भई हाल टंकीसिनवारीमा बस्दै आएका २१ बर्षिय कौशल देवलाई ब्लड क्यान्सर भएपछि उनका साथिहरु सहयोग रकम जुटाउन लागेका हुन् । कौशल देवको अहिले भक्तपुरमा रहेको क्यान्सर हस्पिटलमा विगत ५ महिनादेखि उपचार हुँदै आएको छ । उपचारको लागि पहिलो चरणमा ५ लाख खर्च लाग्ने भएका कारण उनका साथीहरुले विराटनगरमा उपचारमा लाग्ने खर्च जुटाउन थालेका हुन् ।
उपचारका लागि आर्थिक अवस्था कमजोर भएकाले सहयोग रकम संकलन गरेको अभियानका अभियन्ता पेरिस सुबेदीले जानकारी दिए । आफुजस्तै विद्यार्थीको जीवन बचाउनका निम्ति अभियान चलाउनुपरेको सुबेदिले बताए ।
विद्यार्थीहरुले विराटनगरमा शुक्रबार भेला भएर बजारका विभिन्न व्यापारी तथा स्थानियबाट ५० हजार रुपैयाँ संकलन गरेका थिए । त्यस्तै शनिबार नेपाल भारत सिमा बजार रानीबाट ४६,४०० रुपैया संकलन गरेको अभियन्ता पेरिस सुबेदीले जानकारी दिए । साथै उनले हालसम्म २ लाख ४० हजार रुपैयाँ संकलन गरिसकेको जानकारी दिए । उनीहरुले सबैलाई आफ्नो सोइच्छाले सहयोग गर्न आग्रह गरेका छन् ।
