पुस २७, पहिलो नेपाल – नेपाल कम्युनिष्ट पार्टी नेकपा निकट विद्यार्थी संगठन अनेरास्ववियूको केन्द्रीय कमिटीका सदस्यहरुले सपथ ग्रहण गरेका छन्।
आइतबार काठमाडौंमा आयोजित एक कार्यक्रममा ३ सय ३५ जना केन्द्रीय कमिटीका सदस्यहरुलाई पार्टी महासचिव विष्णु पौडेलले सपथ खुवाएका हुन्। सपथ ग्रहण कार्यक्रमलाई सम्बोधन गर्दै महासचिव पौडेलले दुई पार्टीबीचको एकता र पछिल्लो समय प्राप्त उपलब्धीहरुमा विद्यार्थी नेताहरुको सबैभन्दा बढि भूमिका रहेको बताए।
महासचिव पौडेलले विद्यार्थी नेताहरुको सकृयतामा ठुलाठुला सफलताहरु प्राप्त भएको इतिहास रहेकाले पार्टी एकतालाई अझ बलियो बनाउन भूमिका निर्वाह गर्न अग्रह गरे। त्यस्तै अनेरास्ववियूले ४५ सदस्यीय स्थायी कमिटी पनि बनाएको छ। जसमा पूर्व एमाले निकट अनेरास्ववियुबाट २४ र पूर्व माओवादी निकट अनेरास्ववियु क्रान्तिकारीबाट २१ जना रहेका छन्।
दुई ठुला संगठन अनेरास्ववियु र अनेरास्ववियू (क्रान्तिकारी) विचको एकता प्रक्रियालाई टुंगोमा पुर्याउन गत पुस १८ गते अनेरास्ववियू फ्याक्सन इन्चार्ज हितमान शाक्य र सह इन्चार्ज विनोद ढकाल साथै संयोजक ऐन महर र सह संयोजक रञ्जित तामङको उपस्थितिमा भएको बैठकले केन्द्रिय कमिटीको अन्तिम नामावली टुङ्याएको थियो ।
केन्द्रिय कमिटिमा कुल ३३५ मध्ये साविक अनेरास्ववियुबाट १८० र साविक अनेरास्ववियू (क्रान्तिकारी) बाट १५५ जना रहेका छन् । त्यस्तै समान २१ सदस्य रहने गरि निर्वाचन आयोग, लेखा आयोग र अनुशासन आयोग समेत बनाएको थियो । ११ जनाको केन्द्रिय सचिवालय कमिटि भने टुंगोमा पुग्न सकेको छैन् ।
