माघ १, पहिलो नेपाल – धुर्मुस सुन्तली फाउन्डेसनद्वारा चितवनको भरतपुरमा निर्माणाधीन गौतम बुद्ध अन्तरास्ट्रिय क्रीकेट रंगशालालाई सहयोग गर्न बिराटनगरका युवाहरुले चिया बेच्न सुरु गरेका छन् । नेपाल क्रीकेट समर्थक समाज, बिराटनगरमा आवद्ध युवाहरुले सहयोग रकम संकलन अभियान सुरु गरेका हुन्।
बिराटनगरमा सुरु भएको सडक महोत्सवमा क्रीकेट समर्थक समाजले चिया बेच्दै सहयोग रकम संकलन अभियान सुरु गरेको हो । विराटनगरमा पहिलो चरणमा चिया बेचेर सहयोग रकम सकल गरेपनी बिस्तारै यो अभियानलाई बिराटनगर बृहत रुपमा लैजाने नेपाल क्रिकेट समर्थक समाज (एनसीएसएस) विराटनगरका अध्यक्ष इश्वर रेग्मीले बताए । उनले थोपाथोपा मिलेर नै समुन्द्र बन्ने भएकाले एकजनाको थोरै सहयोगपनि यो महाअभियानको लागि एउटा हिस्सा बन्न सक्ने भएकाले सबैलाई सहयोग गर्न अपिल गरे ।
चियाका लागि आवस्यक सामाग्री विभिन्न व्यक्ति तथा व्यापारीहरुले सहयोग गरेका छन् भने एक कप चियाको मूल्य १० रुपैया तोकेपनी स्वैच्छिक रुपमा जतिपनी सहयोग गर्न सकिनेछ। अभियानको दोश्रो चरणमा विभिन्न स्कुल तथा कलेज र संघसंस्थामा सहयोग रकम संकलन गर्ने योजना रहेको अध्यक्ष रेग्मिले बताए ।
जनसहयोगबाट धुर्मुस सुन्तली फाउन्डेसनले चितवनको भरतपुर महानगरपालिकास्थित कृषि तथा वन विश्वविद्यालय परिसर भित्रको शान्ति चोकमा रहेको २० बिघा ६ कठ्ठा क्षेत्रफलमा रहेको जमिनमा २५ हजार दर्शक क्षमताको अत्याधुनिक सुविधासम्पन्न रंगशाला निर्माण गरिरहेको छ । देश तथा विदेशमा विभिन्न अभियानहरु चलिरहेको अवस्थामा एनसिएसएस बिराटनगरले पनि अभियान सुरु गरेको हो ।
