माघ १२, पहिलो नेपाल – प्रदेश १ सरकारले ज्येष्ठ नागरिक दन्त मुस्कान कार्यक्रम भोजपुरबाट सुरुवात गरेको छ । ज्येष्ठ नागरिकलाई थोतेरहित बनाउने उद्देश्यसहित प्रदेश सरकारले भोजपुरको आमचोक गाउँपालिकाबाट दन्त उपहार कार्यक्रम सुरुवात गरेको हो ।
बृद्धबृद्धा अवस्था पुगेर दाँत झरिसकेपछि दैनिक जीवनमा हुने कठाईबाट जोगाउन सामाजिक विकास मन्त्रालयले ज्येष्ठ नागरिक दन्त मुस्कान कार्यक्रमको अवधारणा अगाडी सारेको थियो । चालु आर्थिक वर्षमा प्रदेशका ३० स्थानीय तहका ज्येष्ठ नागरिकलाई दाँत लगाउने योजना छ ।
मुख्यमन्त्री शेरधन राईको जन्म स्थान आमचोकमा शुक्रबार ज्येष्ठ नागरिकलाई दाँत उपहार दिएर कार्यक्रमको शुभारम्भ गरिएको छ । मुख्यमन्त्री राई, सामाजिक विकास मन्त्री जीवन घिमिरे र आमचोक अध्यक्ष अशोक राईले तीनजना ज्येष्ठ नागरिकलाई दाँत लगाई दिनु भएको थियो ।
कार्यक्रममा मुख्यमन्त्री राईले ७२ वर्षिय दुर्गाबहादुर राना मगरलाई, मन्त्री घिमिरेले मदन राईलाई र अध्यक्ष राईले दक्षीमाया राईलाई उपहारस्वरुप दाँत लगाई दिनु भएको थियो । ज्येष्ठ नागरिक सुरक्षा कार्यक्रम अन्तर्गत सुरु गरिएको दन्त उपहार कार्यक्रम आमचोकमा तीनदिनसम्म सञ्चालन हुने अध्यक्ष राईले बताउनुभयो । गाउँपालिकाका सबै ज्येष्ठ नागरिकको दाँत परीक्षण तथा आवश्यकता अनुसार दाँत लगाउने योजना राखिएको छ ।
कार्यक्रममा मुख्यमन्त्री शेरधन राईले नागरिकको चाहना अनुसारको सरकारले योजना अगाडी सार्ने बताउनुभयो । उहाँले प्रदेश सरकारले पूर्वाधार विकाससँगै सामाजिक क्षेत्रमा गर्नुपर्ने उत्तरदायित्वका कामहरु समेत सँगसँगै अगाडी बढाउने बताउनुभयो ।
यसैगरी सामाजिक विकास मन्त्री जीवन घिमिरेले ज्येष्ठ नागरिक, बालबालिका, अपाङ्गता भएका नागरिक, मानसिक समस्यामा परेका नागरिकको संरक्षण सरकारले गर्ने गरि कार्यक्रमहरु अगाडी बढाएको बताउनुभयो । ज्येष्ठ नागरिकलाई दाँत उपहार दिने योजनालाई प्रदेशका सबै स्थानीय तहमा विस्तार गरिने उहाँले बताउनुभयो ।
