माघ १९, पहिलो नेपाल – धरान स्थित केन्द्रिय प्रविधि क्याम्पस हात्तीसारमा आईतवार देखी ‘हात्तीसार एक्स्पो २०२०’ सुरु भएको छ । केन्द्रिय प्रविधि क्याम्पस र स्वतन्त्र विद्यार्थी यूनियनको सयुक्त आयोजनामा भएकाे उक्त एक्स्पो माघ १९ गतेदेखि २१ गतेसम्म तीन दिन हुनेछ ।
५० वटा स्टल रहने उक्त एक्स्पोमा परम्परागतदेखि आधुनिक खानाहरूको प्रदर्शनी हुनेछ। साथमा पोषण जाँच तथा परामर्श सेवा, वैज्ञानिक आविष्कारको प्रदर्शनी, धरान क्षेत्रको भौगर्भिक नमुनाको प्रदर्शनी, कोरोना तथा डेङ्गु लगायतका भयावह रोगहरु सम्बन्धि जनचेतनामूलक जानकारी, जलवायु परीर्वतन सम्बन्धि प्रदर्शनी, रोग निवारणमा औषधिजन्य वनस्पतिहरूको प्रभावको जानकारी, जीवजन्तु सम्बन्धि खोजमुलक प्रदर्शनी रहने आयाेजकले जानकारी दिएको छ।
एक्स्पोमा निःशुल्क रूपमा स्वास्थ्य जाचको साथमा स्वास्थ्यसंग सम्बन्धित जानकारीहरूसमेत लिन सकिनेछ । साथमा मनोरञ्जनका लागि राष्ट्रिय तथा स्थानिय कलाकारहरुको प्रस्तुति रहने प्रचारप्रसार समितिका सम्योजक धिरेन लिम्बुले जानकारी दिए ।
क्याम्पसमा भएको प्रत्येक संकायको कम्तिमा ३ वटा स्टल रहने बताइएको छ । क्याम्पसमा भइरहेको गतिविधि र अनुसन्धानहरुलाई आम जनमानसमा पुर्याउन, क्याम्पसको रिसर्चरहरूलाई प्राेत्साहन गर्न साथमा त्रिविको एकमात्र पोषण तथा आहार विज्ञान कार्यक्रमलाई राष्ट्रिय तथा अन्तराष्ट्रिय स्तरमा परीचित गराउने उद्देश्यले उक्त एक्स्पो गर्न लागिएको आयाेजक कमिटीले जानकारि दिएको छ।
केन्द्रिय प्रविधि क्याम्पसका निमित्त क्याम्पस प्रमुख सहप्राध्यापक दिलकुमार लिम्बुले सरकारी क्याम्पस भएतापनि सरकारले यस क्याम्पस प्रति त्यति चासो नदिएको बताएका छन् । उनले सरकारले उपलब्ध गराउनुपर्ने सुविधा, सेवा साथमा सरकारले हेर्नुपर्ने विषयमा समेत अन्य क्याम्पसलाई भन्दा बेवास्ता गरेकोमा गुनासो पोखेका छन् ।
