क्वारेन्टाइनका लागि निशुल्क होस्टेल उपलब्ध गराउने युवा नेता राकेश रोशनको घोषणा

चैत्र ९, पहिलो नेपाल –
बिराटनगरका युवा नेता तथा सामाजिक अभियन्ता राकेश रोशन यादवले कोरोना भाइरस (कोभिड-१९) को सम्भावित परिस्थितिलाई नियन्त्रण गर्न क्वारेन्टाइनका लागि होस्टेल दिने घोषणा गरेका छन् । सामाजिक अभियनता तथा बिराटनगरका होस्टेल व्यवसायी समेत रहेका यादवले आइतबार प्रदेश १ का सामाजिक विकास मन्त्री जीवन घिमिरेलाई लिखित रुपमा पत्र बुझाउँदै आफ्नो होस्टेल निशुल्क उपलब्ध गराउने घोषणा गरेका हुन् ।

कोरोनासँग लड्न भौतिक पूर्वाधार आवश्यक भएमा १६ वटा कोठा भएको “हाम्रो नेपाल होस्टेल” निशुल्क उपलब्ध गराउने उनले बताए । कोरोना भाइरस विरुद्ध लड्नका लागि आवश्यक परेको खण्डमा प्रदेश नम्बर १ सरकार सामाजिक बिकास मन्त्रालयले प्रयोग गर्न सक्ने उनको भनाइ छ ।

चीनको वुहानबाट फैलिएको कोरोना भाइरसको संक्रमणबाट विश्वनै त्रसित रहेको बेला हाम्रो देश पनि उच्च जोखिमको सूचीमा रहेको हुँदा, प्रदेश सरकार कोरोना भाइरस संक्रमणको सम्भावित जोखिम र यसबाट उत्पन्न हुनसक्ने प्रभावको वारेमा चिन्तित रहेकोले प्रदेश सरकारलाई निशुल्क होस्टेल उपलब्ध गराएको यादवले बताए।