चैत्र २९, पहिलो नेपाल –
मोरङ प्रहरीले जिल्लाभर लकडाउनलाई कडा बनाएको छ। लकडाउनलाई बेवास्ता गरेर सर्वसाधारण बिनाकाम बाहिर निस्कन थालेपछि शनिबारबाट जिल्लाभर थप कडाई गरिएको हो।
विराटनगरमा शुक्रबार साँझदेखि लकडाउन थप कडाई गर्ने भन्दै माइकिङ गरेको थियो। शनिबार विराटनगरका विभिन्न ठाउँमा बिनाकारण बाहिर निस्किएका सर्वसाधारणलाई सडकमै केही समय होल्ड गराईएको छ। त्यस्तै सवारी साधनलाई समेत राखिएको छ।
मोरङ प्रहरीका एसपी विश्व अधिकारीले मोरङका बासिन्दालाई शनिबारबाट मोरङमा गरिने गतिविधिबारे यस्तो सुचना दिएका छन् ।
मोरङ प्रहरीका अनुसार
————————–
१. शनिबार बिहान ८ः०० बजेदेखि १२ः०० बजेसम्म र साँझ १६ः०० बजेदेखि १९ः०० बजेसम्म लक डाउनको पूर्ण पालनाको अनुगमन तथा कार्यान्वयनका लागि जिल्लाभरी नियमित बाहेक थप प्रहरी जनशक्तिको परिचालन गरिनेछ ।
२. हालसम्म ‘प्रहरीको साथी म’ अन्तरगत वडा वडामा गठित प्रहरीका साथीहरु समेत परिचालित रहनेछन् ।
३. कोरोना भाईरसको संक्रणबाट सुरक्षित रहन व्यक्तिगत र सामूहिक सुरक्षाका सबै उपायहरु अबलम्बन गर्दै अपरिहार्य वा अत्यावश्यक वा ननिस्की नहुने अवस्थामा बाहेक घरबाट ननिस्किनु लकडाउनको पालना हो । प्रहरीले माईकिङ लगायतका माध्यमबाट लक डाउनको पालना गर्न अनुरोध गरी रहेको छ । आम सूचना र अनुरोधका बाबजूद लक डाउन उल्लघंन गर्ने व्यक्ति र सवारी साधनलाई नियन्त्रणमा लिईनेछ । संक्रामक रोगसंग प्रचलित कानुन अनुसार दोषीलाई कैदको दण्ड सजायसम्म हुन सक्छ ।
४. स्वास्थ सेवा लगायत तोकिएका अत्यावश्यक सेवासंग सम्बद्ध व्यक्ति र तोकिएको निकायबाट पास जारी गरिएका व्यक्ति र सवारी साधन उपर यो व्यवस्था लागू हुनेछैन् । तथापि यहाँहरुलाई पनि यथासंभव लक डाउनको पालना गर्न अनुरोध गरिएको छ ।
५. स्थानीय तहबाट राहत बितरण हुन बाँकी वडामा राहत बितरणको अवधिमा मात्र यो व्यवस्था लागू हुने छैन् । तथापि राहत संकलनका लागि एक परिवारबाट मात्र एक जना आई राहत लिईसकेपछि तत्काल घर फर्किन अनुरोध गरिएको छ ।
६.हालको आवश्यकतालाई मघ्यनजर राख्दै अनुशासित रुपमा सामाजिक दुरी कायम गर्ने व्यवस्था मिलाई राहत बितरणलाई सभ्य, मर्यादित व्यवस्थित र उदाहरणीय बनाउन संक्रामक रोगबाट आफु सुरक्षित रहुनु पर्ने कुरालाई आत्मसात् गर्दै उच्च मनोबलका साथ स्थानीय निकायलाई उच्चतम् सहयोग, सहकार्य र समन्वय गर्न मातहत प्रहरी ईञ्चार्ज र सम्पूर्ण प्रहरी कर्मचारीहरुलाई निर्देशित गरिएको छ ।
७. राहत बितरण गरिने ‘प्रहरीको साथी म” गठनको क्रममा रहेका वडामा तत्काल राहत बितरणलाई व्यवस्थित बनाउन अन्य वडामा गठित प्रहरीका साथीहरुलाई परिचालन गरिनेछ ।
८. विश्वभरी फैली रहेको कोरोना भाईरसको संक्रमणबाट आफु पनि बाचौं, अरुलाई पनि बचाऔं । यो दायित्व प्रहरीको मात्र नभई हामी प्रत्येकको हो, हरेकको हो । यहाँहरु कै सूरक्षाको लागि यो परिस्थितिमा पनि प्रहरी बाटो बाटोमा छ । आउनुहोस् यो जीवन बचाउन प्रहरीसंगै हामी पनि एकजुट होऔं । लकडाउनको पालना गरौ । “प्रहीको साथी म” बनौं ।
