वैशाख १, विराटनगर –
देशका ५२ जिल्लामा र्यापिट टेस्ट किटबाट परीक्षण सुरु भइसकेको स्वास्थ्य तथा जनसंख्या मन्त्रालयले जनाएको छ ।
मन्त्रालयले आज गरेको पत्रकार सम्मेलनमा पीसीआर मेसिनबाट हालसम्म देशैभर पाँच हजार ६ सय ९१ जनाको कोरोना भाइरसको आशंकामा नमुना परीक्षण गरिएको मन्त्रालयका प्रवक्ता डा. विकास देवकोटाले बताए ।
आज कैलालीकी ६५ वर्षीया महिला र रौतहटको क्वारेन्टाइनमा रहेका १९ वर्षीय युवामा कोरोना संक्रमण देखिएको छ जसमा कैलालीकी ६५ वर्षीया महिलाको सेती प्रादेशिक अस्पतालमा र रौतहतका पुरुषको नारायणी उप–क्षेत्रीय अस्पतालमा उपचार भइरहेको प्रवक्ता डा. देवकोटाले बताए ।
हालसम्म सेती प्रादेशिक अस्पतालमा ५, टेकु अस्पतालमा २, धवलागिरि अस्पताल २ र नारायणी उपक्षेत्री अस्पतालमा ४ जनाको उपचार रहेको उनले जानकारी दिए ।
नेपालमा हालसम्म १४ जनामा कोरोना संक्रमण देखिएको मन्त्रालयले जनाएको छ । मन्त्रालयका अनुसार हालससम्म र्यापिट टेस्ट किट र पीसीआर विधिबाट कोरोना भाइरसको आशंकामा १० हजार ९८२ वटा टेस्ट भइसकेको छ ।
