वैशाख ४, विराटनगर –
व्यवसायीहरु सुमन भट्टराई र सुरेशकुमार राठीले ताप्लेजुङमा खाद्य सामाग्री सहयोग गरेका छन्। लकडाउनका कारण विपन्न वर्गलाई परेको असरलाई मध्यनजर गर्दै व्यवसायीद्वय भट्टराई र राठीले ताप्लेजुङ जिल्ला प्रशासनलाई खाद्य सामाग्री हस्तान्तरण गरेका हुन्।
१२ केजीका दरले ७०० पकेट चामल, २५ केजिको दरले ४२ पकेट मसुरको दाल, ५० केजिको दरले २० बोरा नुन व्यवसायीहरुले उपलब्ध गराएका हुन्। त्यस्तै उनिहरुले डेढ लिटरका दरले बाबा सन्फ्लावर तेल २५ कार्टुन र ८ कार्टुन साबुन पनि जिल्लालाई उपलब्ध गराएका हुन्। राहत स्वरुप उपलब्ध गराएको उक्त खाद्य सामाग्री जिल्ला प्रशासन कार्यलयले जिल्लाका गरिब तथा विपन्न वर्गलाई वितरण गर्ने बताएको छ। जिल्ला प्रशासन कार्यलय ताप्लेजुङका अनुसार कोभिड-१९ नियन्त्रण तथा व्यवस्थापन जिल्ला समितिले उक्त राहत सामाग्री जिल्लाका विभिन्न स्थानीय निकायलाई उपलब्ध गराउने छ। स्थानिय निकायमार्फत राहत सामाग्री वितरण गरिनेछ।
विश्वव्यापी महामारीको रुपमा फैलिएको कोरोना भाइरसबाट देश यतिबेला लकडाउनमा छ। लकडाउनका कारण गरिब तथा विपन्न वर्गलाई समस्या भैरहेका बेला राहत स्वरूप खाद्य सामाग्री जिल्लालाई उपलब्ध गराईएको व्यवसायी सुमन भट्टराईले बताए। सरकारले एकद्वार प्रणालीबाट राहत वितरण गर्ने निर्णय गरेका कारण जिल्ला प्रशासन कार्यलाईलाई सामाग्री उपलब्ध गराईएको भट्टराईले बताए । उनले भने, हरेक ठाउँमा सरकारको मात्र मुख ताकेर हुँदैन, हामीले पनि सकेको सहयोग गर्नुपर्छ भन्ने ठानेर राहत सामाग्री सहयोग गरेका हौँ।’
