वैशाख ५, विराटनगर –
व्यवसायी तथा समाजसेवी सुमन भट्टराईले दुहबी नगरपालिकालाई राहतका लागि आर्थिक सहयोग गरेका छन्। भट्टराईले नगरपालिकालाई १ लाख १ हजार रुपैयाँ आर्थिक सहयोग गरेका हुन्।
लकडाउनका कारण विपन्न वर्गलाई परेको असरलाई मध्यनजर गर्दै व्यवसायी तथा समाजसेवी भट्टराईले राहतका लागी नगरपालिकालाई आर्थिक सहयोग गरेका हुन्। भट्टराईले १ लाख १ हजारको चेक नगरप्रमुख बेद कुमार गच्छदारलाई हस्तान्तरण गरेका हुन्। रकम हस्तान्तरण कार्यक्रममा इन्स्पेक्टर पवन कार्की, नगरका कार्यकारी प्रमुख विनोद न्यौपाने , वडा नं ३ का अध्यक्ष माधव भण्डारी, वडा नं ५ का अध्यक्ष रमेश रौनियार र युवासंघ नेता रोशन कार्कीको उपस्थिति रहेको थियो।
उक्त रकम नगरपालिकाले गरिब, विपन्न तथा मजदुरहरुलाई राहत वितरण गर्न खर्च गर्ने नगरपालिकाले बताएको छ। विश्वव्यापी महामारीको रुपमा फैलिएको कोरोना भाइरसबाट देश यतिबेला लकडाउनमा छ। लकडाउनका कारण गरिब तथा विपन्न वर्गलाई समस्या भैरहेका बेला राहतका लागि नगरपालिकालाई आर्थिक सहयोग गरेको समाजसेवी सुमन भट्टराईले बताए। सरकारले एकद्वार प्रणालीबाट राहत वितरण गर्ने निर्णय गरेका कारण दुहबी नगरपालिकालाई रकम उपलब्ध गराईएको भट्टराईले बताए । उनले भने, हरेक ठाउँमा सरकारको मात्र मुख ताकेर हुँदैन, हामीले पनि सकेको सहयोग गर्नुपर्छ भन्ने ठानेर राहतका लागि आर्थिक सहयोग गरेको हो।
भट्टराईले केहिदिन अघि मात्र ताप्लेजुङ जिल्ला प्रशासनलाई पनि राहतका लागि खाद्य सामाग्री उपलब्ध गराएका थिए।
