राहतमा कुहिएको दाल वितरण गर्ने मेयर पक्राउ

वैशाख ९, काठमाडौ –
राहत वितरणमा कुहिएको दाल दिएको आरोपमा बाराको कलैया उपमहानगरपालिकाका मेयरलाई प्रहरीले पक्राउ गरेको छ। बारा जिल्ला प्रहरी कार्यालयले मेयर राजेशराय यादवलाई सोधपुछको लागि नियन्त्रणमा लिएको एसपी कृष्ण पंगेनीले जानकारी दिनुभयो।

गत २८ गते उपमहानगरले वितरण गरेको राहतमा कुहिएको दाल भेटिएपछि त्यसकै भोलिपल्ट प्रहरी र जिल्ला प्रशासन कार्यालयले उनको घरमा छापा मारेको थियो। प्रहरीले यसैमा संलग्न अन्य ७ जनालाई पनि पक्राउ गरेको छ ।

उपमहानगरले बितरण गर्ने राहतको लागि मेयर रायले दाल बिक्री गरेका थिए । राहतमा बाँड्नका लागि नजिकका वडाध्यक्षहरुलाई चार वर्ष पुरानो दाल बेचेको पाइएको छ ।

कुहिएको दाल बिक्री गरेको पाइएपछि स्थानीय प्रशासनले कलैया उपमहानगरपालिका–७ स्थित यादव चिस्यान गोदाम (कोल्ड स्टोर) मा शनिबार शिलबन्दी गरेको थियो।