वैशाख १०, विराटनगर –
लकडाउनका कारण मोरङमा लाखौंको तरकारी बारीमै कुहिन थालेको छ। तरकारी बजार लैजान सक्ने अवस्था नभएकाले बारीमै कुहिन थालेको कटहरी गाउँपालिका नयाँ बजारका किसान कोपिन्द्र सिंहले बताए। लकडाउनअघि बारीमै आएर व्यापारीले किनेर लैजाने गरेकोमा अहिले कोही व्यापारीसमेत नआएको उनले गुनासो गरे।
आफुले दुख गरेर उत्पादन गरेको तरकारीले बजार नपाएपछि बारिमै कुहिए पनि कोपिन्द्र सिंहलले गरिबका लागि सहयोग गरेका छन्। उनले विराटनगरका युवाहरुले चलाएको खाना खुवाउने अभियानलाई सहयोग गरेका हुन्। विराटनगरमा विगत २३ दिनदेखि युवाहरुले गरिब,मजदुर र घरबारविहीनहरुलाई निशुल्क खाना खुवाउँदै आएका छन्। त्यही खाना खुवाउने अभियानका लागि किसान कोबिन्द्र सिंहले अभियान सञ्चालन अवधिभर टमाटर, खुर्सानी र बन्दाकोपी निशुल्क उपलब्ध गराउने भएका छन्। सिंहले भने,’ तरकारी त्यसैपनी कुहिएर जाने हो। बारिमै कुहिएर जानुभन्दा गरिब असहायका लागि सहयोग गर्दा राम्रो हुन्छ। यति राम्रो अभियानमा सहयोग गर्न पाउँदा खुसी लागेको छ।’
यसैबीच सधैं खेतमै आएर तरकारी लैजाने व्यापारी लकडाउनका कारण गाउँमा तरकारी किन्न जान सकेका छैनन्। कटहरी ४ नयाँबजारकी किसान मिना कुमारी मेहताले पहिले बारिमै तरकारी लिनलाई गाडी आउँथ्यो अहिले आउन छाडेको बताईन्। उनले भनिन,’ छ कठ्ठा माटोमा लगाएको तरकारी बिक्नै छाड्यो। सबै बारिमै कुहिएको छ। पहिले ब्यापारीहरु तरकारी लिनलाई बारिमै आउँथे तर अहिले किन्नै मान्दैनन्। भन्छन्, पहिलेकै कुहिएको छ किनेर के गर्नु ।’ उनले तरकारी नबिकेर लाखौँको घाटा भएको बताउँदै पेसा नै तरकारी खेती भएकोले अहिले दैनिकी चलाउन नै गाह्रो भैरहेको बताईन्।
लकडाउनका कारण तरकारी बिक्न नपाउँदा लगानी पनि नउठ्ने किसानहरु बताउँछन्। कटहरीमा टमाटर, खुर्सानी , कोबि लगायतका तरकारीहरु बारिमै कुहिएका छन्। यसअघि कटहरीमा उत्पादित तरकारी काठमाडौ सम्म पुग्ने गरेको किसानहरुले बताए।
