वैशाख १४, विराटनगर –
नेकपा प्रदेश सांसद भिम आचार्यको पहलमा समाजसेवी तथा व्यापारी सुमन भट्टराईले राहतका लागि चामल सहयोग गरेका छन् । उनले सुनसरी निर्वाचन क्षेत्र नं १ मा राहतका लागि चामल सहयोग गरेका हुन् ।
त्यस क्षेत्रका सांसद समेत रहेका आचार्यले व्यवसायी भट्टराईको सहयोगमा आइतबार बराह नगरपालिकाका ५ वटा वडामा राहतका चामल हस्तान्तरण गरेका छन्। आचार्यको निर्वाचन क्षेत्रमा २७ वटा रहेका छन्। प्रत्येक वडाका लागि ५ सय केजिका दरमा चामल सहयोग गरेको समाजसेवी सुमन भट्टराईले बताए। उनले भने, ‘आइतबार बराह नगरपालिकाका ५ वटा वडा र रामधुनी नगरपालिकाका २ वडामा चामल हस्तान्तरण गरिएको छ। सोमबार धरान उपमहानगरपालिका १० वडामा चामल हस्तान्तरण गर्ने कार्यतालिका छ।’
विश्वव्यापी महामारीको रुपमा फैलिएको कोरोना भाइरसलाई रोकथाम तथा नियन्त्रणका लागि सरकारले लकडाउन गरेको छ। विगत एक महिनादेखि जारी लकडाउनका कारण गरिब ,विपन्न तथा मजदुरहरुलाई समस्या परेको भन्दै आफ्नो पहलमा राहत वितरण गरेको सांसद भिम आचार्यले बताए। सरकारले एकद्वार नितिबाट राहत वितरण गर्ने निर्णय गरेकोले राहत स्वरुप सहयोग गरेको चामल वडा कार्यलयलाई हस्तान्तरण गरेको उनले बताए।
चामल हस्तान्तरण कार्यक्रममा प्रतिनिधिसभा सांसद जयकुमार राई, प्रदेश सांसद उमिता बराइली तथा नेकपाका स्थानीय नेताहरुको सहभागीता रहेको थियो।
