वैशाख १७, विराटनगर –
नेकपाका प्रदेश सांसद भिम आचार्य राहत वितरणमा ब्यस्त रहेका छन् । आचार्यको पहलमा समाजसेवी तथा व्यापारी सुमन भट्टराईले राहतका लागि चामल सहयोग गरेका छन् । उनले सुनसरी निर्वाचन क्षेत्र नं १ मा राहतका लागि चामल सहयोग गरेका हुन् ।
त्यस क्षेत्रका सांसद समेत रहेका आचार्यले व्यवसायी भट्टराईको सहयोगमा राहतका लागि चामल वितरण गरेका हुन्। सुनसरी क्षेत्र नं १ मा २७ वटा वडा रहेकोमा प्रत्येक वडामा ५ सय केजिका दरले चामल हस्तान्तरण गरिएको समाजसेवी सुमन भट्टराईले बताए। आइतबार बराहक्षेत्र नगरपालिकाका ५ वटा वडा र रामधुनी नगरपालिकाका २ वडामा, सोमबार धरान उपमहानगरपालिका १२ वडामा र मंगलबार ७ वडामा चामल हस्तान्तरण गरिएको भट्टराईले बताए।
विश्वव्यापी महामारीको रुपमा फैलिएको कोरोना भाइरसलाई रोकथाम तथा नियन्त्रणका लागि सरकारले लकडाउन गरेको छ। विगत एक महिनादेखि जारी लकडाउनका कारण गरिब ,विपन्न तथा मजदुरहरुलाई समस्या परेको भन्दै आफ्नो पहलमा राहत वितरण गरेको सांसद भिम आचार्यले बताए। सरकारले एकद्वार नितिबाट राहत वितरण गर्ने निर्णय गरेकोले राहत स्वरुप सहयोग गरेको चामल वडा कार्यलयलाई हस्तान्तरण गरेको उनले बताए। ‘लकडाउनको समयमा हामी जनताको घर दैलोमा पुगेर उहाँहरुको समस्या बुझिरहेका छौं । विपतमा पर्नु भएका नागरिकले आ–आफ्नो वडा कार्यालयमा सम्पर्क गरेर राहत लिन अनुरोध गरेका छौं ।’–आचार्यले भने–‘त्यसका लागि संघ प्रदेश र स्थानीय तह राहत जुटाउन लागि रहेको छ । तपाईहरु घरमै बसिदिएर सरकारलाई सहयोग गरिदिनु होला ।’
