कोरोना संक्रमितको संख्या ८२ पुग्यो

वैशाख २३, नेपालगन्ज –
नेपालगञ्जमा थप ७ जनामा कोरोना संक्रमण पुष्टि भएको छ। नयाँ ७ जना संक्रमित बाँकेको नेपालगञ्ज उपमहानगरपालिका वडा नम्बर ८ का हुन् । संक्रमित हुनेमा ४ जना महिला र ३ जना पुरुष रहेका छन् ।

मंगलबार भेरी अस्पताल नेपालगञ्जमा गरिएको परीक्षणमा ९, ३२, ३४ र ५५ वर्षका महिला तथा २२, ३० र ४० वर्षका पुरुषमा कोरोना भाइरस पुष्टि भएको स्वास्थ तथा जनसंख्या मन्त्रालयले जनाएको छ । यससँगै नेपालमा कोरोना संक्रमितको कुल संख्या ८२ पुगेको छ ।

यसअघि बाँकेमा एकैदिन १५ जना संक्रमित फेला परेका थिए । संक्रमितको संख्या बढेपछि नेपालगञ्जमा २५ गतेसम्मलाई निषेधित क्षेत्र घोषणा गरिएको छ । नेपालमा हालसम्म १६ जना निको भइसकेका छन् ।