संक्रमितको संख्या ९९ हुँदा निको हुने २२ जना पुग्यो

वैशाख २४, काठमाडौ –
नेपालमा कोरोना भाइरसबाट संक्रमित हुनेको संख्या ९९ पुगेको छ । बुधबार थप १७ जनामा कोरोना संक्रमण पुष्टि भएसँगै संक्रमितको संख्या ९९ पुगेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए ।

राष्ट्रिय जनस्वास्थ्य प्रयोगशालामा गरिएको परीक्षणमा पर्साका १७ जनाको रिपोर्ट पोजिटभ आएको उनले बताए । संक्रमितहरु २ महिनादेखि ६६ वर्षसम्मका भएको पनि उनले जानकारी दिए ।

बुधबार संक्रमण पुष्टि भएकाहरुमध्ये १० जना पुरुष र ७ जना महिला रहेको प्रवक्ता देवकोटाले जानकारी दिए ।

त्यस्तै उपचार पछि निको हुनेको संख्या २२ पुगेको छ । बुधबार नै कोसी अस्पतालमा उपचाररत ६ जना भारतीय डिस्चार्ज भएसँगै निको हुनेको संख्या २२ पुगेको हो।