वैशाख २७, काठमाडौ –
भारतले दार्चुलाको लिपुलेक कालापानी क्षेत्रबाट मानसरोबर जाने सडक बनाएर सञ्चालनमा ल्याएको खबर सार्वजनिक भएपछि नेकपा विदेश विभागले मुख खोलेको छ । विदेश विभागका उप प्रमुख विष्णु रिजालले ट्वीट गर्दै नेपालको एक इञ्च जमिन पनि छोड्न नसकिने बताएका हुन् ।
उनले नेपाल सरकारले तत्काल भारतसँग कुटनीतिक वार्ता थाल्नुपर्नेमा पनि जोड दिएका छन् । उनले लेखेका छन, ‘ केही समयअघि भारतले नेपालको लिपुलेक-कालापानी राखेर नक्सा जारी गरेपछि दुई देशबीच वार्ताको प्रतीक्षा भइरहेको बेला त्यहीँबाट चीनको मानसरोबर पुग्ने बाटो खोेलेको छ । यसलाई सरकारले गम्भीरतापूर्वक लिनुपर्छ र कूटनीतिक माध्यमबाट सुल्झाउन पहल थालिहाल्नुपर्छ।’
लिपुलेक कालापानीलाई समेटेर भारतले राजनीतिक नक्सा सार्वजनिक गरेपछि नेपालले थालेको कुुटनीतिक प्रयासलाई थप प्रभावकारी बनाउनुपर्नेमा उनले जोड दिएका छन् । पूर्व प्रधानमन्त्री तथा बरिष्ठ नेता माधव कुमार नेपाल नेकपाको विदेश विभाग प्रमुखको जिम्मेवारीमा छन् ।
हाम्रो स्पष्ट नीति छः नेपाल न आफ्नो एक इन्च भूमि छाड्छ, न त कसैको एक इन्च भूमिमा आँखा लगाउँछ । नेपाल सरकारले वार्ताका लागि यसअघि नै भारतसमक्ष प्रस्ताव पठाएकोमा ताकेता गरोस् । @PradeepgyawaliK @bairagi_shanker @PM_Nepal @nilacharya
— Bishnu Rijal (@bishnurijal1) May 8, 2020
