वैशाख २८, काठमाडौं –
नेपाल कम्युनिष्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल प्रचण्डले लिपुलेकको सीमा विवादमा चीन पनि संलग्न भएको बताएका छन् ।
प्रतिनिधिसभाको राज्य व्यवस्था तथा सुशासन समितिको बैठकमा उनले नेपाल र भारतबीच लिम्पियाधुरामा रहेको सीमा विवाद अब भारतसँग मात्र छलफल गरेर समाधान नहुने बताएका हुन् ।उनले सुगौली सन्धिअनुसार लिम्पियाधुरा कालीनदीको मुहान भएको र कालीनदीको पूर्व नेपाल,पश्चिम भारत भन्न्ने कुरा स्पष्ट पार्दै यो समस्या समाधानको निम्ति राजनीतिक र कुटनीतिक पहल गर्नुपर्ने बताए । लिपुलेक प्रकरणपछि यो त्रिदेशीय जस्तो बन्न गएको र यो दुईवटा देशले मात्रै हल गर्न अप्ठेरो भएको बताउँदै चिनसँग पनि वार्ता गर्नुपर्ने बतएका हुन् ।
अध्यक्ष प्रचण्डले सीमा विवादको विषय अहिले नै अन्तर्राष्ट्रिय अदालतमा लैजाने विषयमा भने एकपटक सोच्नुपर्ने बताए । कालापानीमा भारतीय सेना झण्डै ६०/६५ वर्ष पहिल्यैदेखि बसिराखे पनि यो समस्या समाधानका लागि किन विगतदेखि नै पहल हुन सकेन भन्ने विषयमा विश्लेषण हुनुपर्ने प्रचण्डले बताए ।
