जेष्ठ १, विराटनगर –
प्रमुख प्रतिपक्षी दल नेपाली काङ्ग्रेसको विद्यार्थी संगठन नेपाल विद्यार्थी संघ (नेविसंघ) ले विराटनगरमा भारतीय प्रधानमन्त्री नरेन्द्र मोदीको पुत्ला जलाएको छ।
नेविसंघ महेन्द्र मोरङ क्याम्पसले बुधबार साँझ विराटनगरको रोडशेष चौकमा विरोध प्रदर्शन गर्दै मोदिको पुत्ला दहन गरेको हो । भारतले नेपाली भुमी कालापानी हुँदै चिनको मानसरोवर जाने सडक निर्माण गरेपछि देशभर यतिबेला विरोध भैरहेको छ । त्यसै अनुरुप उनिहरुले राँके जुलुस सहित भारतीय विस्तारवाद मुर्दावाद, सिमा मिच्न पाइँदैन, यस्तो छिमेकी चाहिँदैन, लिम्पियाधुरा , कालापानी र लिपुलेक हाम्रै हो भन्दै नारा लगाएका थिए ।
महेन्द्र मोरङ नेविसंघका सभापति जस्वन्त पौडेलले नेपाली भुमी मिचेर सडक बनाएकोले यस्ता बैमान छिमेकीको सम्मान गर्नुपर्ने आवस्यकता नै नरहेको बताएका छन्। उनले नेपाल सरकारलाई पनि तत्काल नेपाली भुमी फिर्ता ल्याउन आग्रह गरेका छन् ।
