जेठ २२, विराटनगर –
बजेट अभावले प्रदेशवासीलाई राहत वितरण रोकिएको वेला प्रदेश १ का मन्त्री जगदीश कुसियतले भने दुई करोडबराबरको गाडी खरिद गर्न लागेका छन् । प्रदेश १ का वन, वतावरण, उद्योग तथा पर्यटनमन्त्री कुसियतले १ करोड ७ लाख ५० हजार बराबरको गाडी खरिद गर्न लागेका छन् ।
लकडाउनका कारण गरिब, विपन्न तथा मजदुर वर्गलाई समस्या परेपनि सरकारले राहत वितरण गरेको छैन् तर मन्त्री कुसियतले भने यहि बेला आफ्ना लागि दुई करोड सात लाख ५० हजारको गाडी किन्न लागेका छन् । उनि प्रदेश १ सरकारको कोरोना संक्रमण रोकथाम, नियन्त्रण तथा उपचार समितिको आपूर्ति व्यवस्था संयोजक पनि हुन् ।
कोभिड संक्रमणले आर्थिक क्षति पुर्याउने भएकाले गाडीलगायतका विलासिताका सामग्री खरिद नगर्ने सरकारको स्पष्ट नीति छ। तर मन्त्री कुसियतलाई भने सरकारी नीतिले प्रभावित गरेको छैन ।
देशमा ११ चैतबाट लकडाउन सुरु भएको हो भने मन्त्री कुसियतले नेतृत्व गरेको मन्त्रालयले पहिलोपटक १८ चैतमा सूचना प्रकाशित गरेर गाडी खरिद गर्न टेन्डर मागेको थियो । देशमा कोभिड संक्रमण फैलिएर जनताले दुःख पाए पनि खरिद प्रक्रिया रोकिएन। बरु, १२ जेठमा मन्त्रीका लागि दुई करोड सात लाखको गाडी खरिद गर्ने टुंगो लागेको छ । यही वेला मन्त्रालयका लागि ८५ लाख मूल्यबराबरका दुईवटा पिकअप भ्यान पनि खरिद हुँदै छ । नयाँपत्रीका बाट
