असार २०, विराटनगर –
नेपाल कम्युनिस्ट पार्टी नेकपाका अध्यक्ष तथा प्रधानमन्त्री केपि शर्मा ओलिको पक्षमा प्रदर्शन गर्ने नेकपाका कार्यकर्तालाई कारबाहीको माग गर्दै मोरङका नेकपा निकट युवा विद्यार्थीले धर्ना दिएका छन् । विराटनगर स्थित पाञ्चालीमा रहेको पार्टी कार्यलयमा शनिबार अनेरास्ववियू र राष्ट्रिय युवा संघका नेता कार्यकर्ताले धर्ना दिएका हुन् ।
पार्टीको स्थायी समितिको बैठकमा प्रधानमन्त्री ओलीको राजीनामा माग भएपछि ओलीपक्षका कतिपय कार्यकर्ताले अन्य शीर्ष नेताविरुद्ध शुक्रबार विराटनगरमा प्रदर्शन गरेका थिए । धर्ना दिनुभन्दा अगाडि युवा विद्यार्थीहरुले मोरङका पार्टी अध्यक्ष ऋशिकेष पोख्रेल तथा सचीव गणेश उप्रेतीलाई
सो प्रर्दशनमा सहभागीता जनाएका नेकपाका सदस्यहरुलाई कारबाहीको माग गरेका थिए ।
शुक्रबारको प्रदर्शनमा पार्टीका अर्का अध्यक्ष पुष्पकमल दाहाल, वरिष्ठ नेता मधव नेपाल लगायतका नेतालाई गाली गलौज गरिएको भन्दै दाहाल र माधव नेपाल पक्षीय युवा संघका नेता तथा विद्यार्थी नेतासहितको टोलीले शनिबार मोरङका पार्टी अध्यक्ष ऋषिकेश पोखरेल, सचिव गणेश उप्रेती, विराटनगर नगरसमितिका अध्यक्ष सागर थापा र सचिव हेम कार्कीसहितको टोलीलाई त्यस्ता प्रदर्शन रोक्न दबाब दिएका छन् ।
पार्टी नेताहरुलाई दबाब दिन अनेरास्ववियूका नेता ओसिम आलम तथा राष्ट्रिय युवा संघका केन्द्रिय सदस्य इश्वरी आचार्यको नेतृत्वमा ४ दर्जन बढी युवाहरु पार्टी कार्यालय पुगेका थिए । विद्यार्थी नेता आलम र युवा संघका नेता इश्वरी आचार्यले पार्टीका शीर्ष नेताहरुविरुद्ध गाली गलौज गर्ने र भारतीय दलालको रुपमा चित्रित गर्दै सडकमा आउने क्रमलाई नरोक्ने हो भने आफूहरु पनि केपी ओलीको राजीनामा माग्दै सडकमा आउने बताए । उनले सडकमा शीर्ष नेताहरुको बद्नाम गर्नेगरी नाराबाजी, जुलुस गर्नेलाई कारबाही हुनुपर्ने बताए ।
सो अवसरमा मोरङका नेकपा अध्यक्ष ऋषिकेश पोखरेलले पार्टीको सदस्य भएको व्यक्ति स्वतन्त्रको नाममा सडकमा आएर नेताका विरुद्धमा तथानाम गाली गलौज गर्नेहरु पार्टी सदस्य हुन नसक्ने बताए । यदि नेकपाको कुनैपनी कमीटिमा रहेको व्यक्तिले त्यसरी स्वतन्त्रताको नाममा आफ्नै पार्टीका कुनै नेतारुलाई गालिगौज तथा कुनै नेताको समर्थनमा प्रदर्शन गरेको भए त्यसलाई कारबाही गरिने बताए । यस्तै नेकपा मोरङका सचिव गणेश उप्रेतीले स्वतन्त्रको नाममा आन्दोलन गर्नेहरुको नाम लिष्ट लिएर आए कारबाही गरिने प्रतिबद्धता जनाए ।
