साउन १३, विराटनगर –
मोरङको धनपालथान गाउँपालिकामा निर्माणाधिन सडकमा जनप्रतिनिधि र ठेकेदार हावी हुँदा काममा ढिलाइ र लापरबाही भएको छ । निर्माणाधीन दादरबैरिया चौकदेखी फुटानी चौकसम्मको सडकमा भुक्तानी सम्बन्धमा विवाद चुलिएर प्राविधिकहरुमाथी दुव्र्यवहार समेत हुनुको साथै स्थानीयको गलत बुझाईले उनिहरु थुनिएका थिए ।
प्रदेश सरकारको सशर्त अनुदान र गाउँ पालिकाको साझेदारमा दादवैरिया चौकदेखि फुटानी चौकसम्मको २६ सय मिटर कालोपत्रे सडक आ.ब. ०७५/०७६ मै दुई चरणमा ठेक्का लागेपनी गत आ.ब. काम सम्पन्न हुन सकेको थिएन्। उक्त अधुरो कार्यको गाउँपालिकाबाट २०७६ माघ महिनामै म्याद थप भएतापनी ठेकेदारको लापरबाहीले सडक निर्माण कार्यमा ढिलाई हुँदै आएको थियो । पछिल्लो समय कोभिड-१९ र वर्षातको कारण देखाउँदै निर्माणको काम ढिलो सुरु गरेको थियो ।
काम ढिलो गर्नुमा रामा विल्डर्स , राजविराजको लापरबाही स्पष्ट देखिन्छ । रामा विल्डर्सले ५ नम्बर वडाका वडाध्यक्षसँग साँठगाँठमा काम नै नगरी गाउँपालिका कर्मचारीहरुलाई विकास विरोधी आरोप लगाएर अग्रिम भुक्तानीका लागि दबाव दिँदै आएको थियो ।
असारको अन्तिम दिन २६०० मिटर कालोपत्रे हुनुपर्नेमा स्थलगत अनुगमन गर्दा करिब ८५० मिटर मात्र कालोपत्रे भएपनी वडाअध्यक्ष र ठेकेदार कम्पनीले सम्पुर्ण रकम निकासीको लागि गाउँपालिकाका कर्मचारीलाई दबाब दिँदै आएका थिए । अर्कोतिर सोही दिन नाँपजाँच गर्नुभन्दा अगाडि गाउँपालिकाको अध्यक्षतामा बैठक बसि सोही मितिसम्म जेजति काम भएको छ सोको मात्र भुक्तानी दिने भनी सम्झौता पनि भएको थियो । तर नाँपजाँचमा खटिने इन्जिनियर राजेश गिरिको नेतृत्वमा प्राविधिक अनिल सिंह र दिनेश मण्डल माथी दुर्ववहारका साथै स्थानीयले थुनेका हुन् । स्थानीयहरुलाई ठेकेदार र वडाअध्यक्षले गलत प्रचार र भ्रम छरेर कर्मचारीहरुमाथी विरोध प्रदर्शन गर्न बाध्य पारेका थिए ।
यसरी २६०० मिटरको कार्य सम्पन्न नगरी गाउँपालीकाले अग्रिम भुक्तानी गर्न नसकिने भनेपछि विवाद भएको देखिन्छ । अर्कोतिर रोचक कुरा असार ३० गते वडा नम्वर ५ र वडा नम्बर ६ दुबै ठेक्का नम्बर २१/०७५/०७६ को कार्य सम्पुर्ण सम्पन्न भएको भनी गाउँपालिका समक्ष सिफारिस समेत गरेको थियो तर असार ३१ गते राती ८ बजे दुर्ववहार भई बन्दीमा परेका प्राविधिक र कर्मचारीहरुलाई प्रहरीको टोलिले उद्घार गर्नुपुर्व भएको सहमतिमा काम पूरा नभएको उल्लेख छ । गलत नियत राखेर दबाब दिई रकम निकास गराउन लगाउने ठेकेदार कम्पनी रामा विल्डर्सका मालिक कन्हैया ठाकुर र सोही वडाका वडाअध्यक्ष गयानन्द सरदार अन्ततः विफल भएका छन् ।
दबाबमा परेर काम गराउने वडाअध्यक्ष र ठेकेदार कम्पनीले सम्पुर्ण काम सकेर भुक्तानी माग्दा विवाद नै नहुने भएतापनी कामै नसकि अग्रिम भुक्तानीका लागि दबाब दिँदा समस्या उत्पन्न भएको देखिन्छ ।
