साउन १३, काठमाडौ –
नेकपाका वरिष्ठ नेता माधवकुमार नेपालले आफूलाई कुनैपनी पद नचाहिएको स्पष्ट पारेका छन्। उनले आफु विचार र विधिको पक्षमा स्पष्ट रूपले उभिएको बताएका हुन् ।
प्रधानमन्त्री केपी ओलीसँगको पछिल्लो भेटवार्ताबारे उनले आफूले एक व्यक्ति : एक जम्मेवारीको नीति कार्यान्वयनका लागि विचार र विधिअनुसार पार्टी र सरकार सञ्चालन गर्नुपर्ने प्रस्ताव राखेको स्पष्ट पारेका हुन् ।
प्रधानमन्त्री ओलिले फोनबाट आग्रह गरेर सम्पर्क व्यक्ति पठाएपछि भेटवार्ताका लागि माधव नेपाल बालुवाटार गएका थिए तर आशंका बढाउने गरी गलत ढंगले सूचना सम्प्रेषित हुनसक्ने भन्दै नेता नेपालले प्रचण्डको जानकारीमै प्रधानमन्त्री सँग कुरा गरेका थिए । कुराकानीका क्रममा नेता नेपालले आफुलाई कुनै पाद नचाईएको प्रष्ट पारेका थिए। माधव नेपाल निकट श्रोतका अनुसार कुराकानीका क्रममा नेता नेपालले, ‘सकभर जेठ २ को सहमतिअनुसार प्रचण्डजिलाई प्रधानमन्त्री बनाएर जाउँ, त्यस्तो होइन भने जसलाई बनाए पनि हुन्छ, तर अहिलेलाई अध्यक्ष छोड्नुस्, त्यसबाट पार्टी पनि राम्रोसँग चल्छ, तपाईं प्रधानमन्त्री भएर चलाउनुस्, राम्रो वातावरण बन्छ, मेरो सहयोग रहन्छ भनेको थिएँ, तर अर्कै तरिकाबाट बाहिर कुरा आयो ।’
त्यस्तो प्रस्तावपछि प्रधानमन्त्री ओलीले दुवै पद छाड्न नमानेपछि नेता नेपाल बालुवाटारबाट हिँडेका थिए । भेटमा प्रधानमन्त्री ओलिले अझै कुरा नसकिएको भन्दै अर्कोपटक भेटौँला समेत भनेको श्रोतले बतायो ।
नेपालले प्रधानमन्त्रीनिकट नेताहरूमार्फत ओलीले अध्यक्ष छाडेको अवस्थामा अहिलेलाई वामदेव गौतम, झलनाथ खनाल वा दोस्रो पुस्ताका जोकोहीलाई केन्द्रीय कमिटीबाट विधिसम्मत निर्णय गराएर जान सकिने प्रस्तावसमेत गरेका थिए। नेता नेपालले केन्द्रिय कमिटीबाट निर्णय गरेर दोश्रो पुस्ताका शंकर पोख्रेललाई पनि अध्यक्ष बनाएर जान सकिने प्रस्ताव गरेका थिए ।
भेटमा नेता नेपालले भने, ‘मलाई अहिले अध्यक्ष वा प्रधानमन्त्री हुनु छैन, पार्टीमा विचार, विधि, पद्धति र राम्रो संस्कृति चाहिएको छ । सरकार लोकप्रिय ढंगले चलोस् भन्ने मेरो चाहना छ । कुनै पनि पदमा मरिहत्ते गर्ने मान्छे म होइन ।’
