साउन १८, विराटनगर –
विराटनगरमा कोरोना परिक्षणको दायरा बढाईएको छ । पछिल्ला पाँच दिनका ६७ जनामा कोरोना संक्रमण पुष्टि भएपछि दुई साता लकडाउन गरिएको विराटनगरमा पीसीआर परीक्षणलाई तीव्रता दिइएको छ । संक्रमण रोकथामका लागि गरिएको लकडाउनमा स्वाब परीक्षण बढाइएको महानगरपालिकाका जनस्वास्थ्य महाशाखा प्रमुख रमेश कार्कीले बताए ।
दैनिक सय जना हाराहारीको संख्यामा हुँदै आएको पीसीआर परीक्षणलाई ५ सय पुर्याउने लक्ष्यका साथ काम गरिरहेको कार्कीले बताए । लकडाउनले सर्वसाधारणको चलायमान अवस्थालाई स्थिर बनाउँदा परीक्षणको दायरा बढाइएको कार्कीले बताए ।
व्यापारी, चिकित्सक, समाजका अगुवा व्यक्तिहरुलाई नै कोरोना संक्रमण देखिन थालेको छ भने महानगरमा संक्रमण पुष्टि भएका ६७ जनाको ट्राभल हिस्ट्री नै छैन । महानगरमा हालसम्म संक्रमण पुष्टि भएका १ सय ८ जनामध्ये ३० जना निको भएर घर फर्केका छन् । संक्रमण पुष्टि भएकामध्ये कोसी अस्पतालका एक चिकित्सक, नर्स, स्वास्थ्यकर्मी र कर्मचारीसहित ५, विराट नर्सिङ होमका चिकित्सक, स्वास्थ्यकर्मी, कर्मचारी गरी २१, प्रदेश १ प्रहरी कार्यालयका २४ जना प्रहरीलगायत समाजका अगुवाहरू छन् ।
