साउन १९, विराटनगर –
सोमबार प्रदेश १ मा ५६ जना कोरोनाका नयाँ संक्रमित थपिएका छन् । जसमध्ये सबैभन्दा धेरै मोरङका छन् । सोमबार मोरङमा मात्रै ४६ जना संक्रमित थपिएका छन् ।
मोरङमा थपिएकामध्ये २२ जना विराटनगर महानगरपालिका छन् । जसमा प्रदेश प्रहरी कार्यालयका ७ जना, प्रदेश सरकारका मुख्य न्यायाधीवक्ता चुढामणी आचार्यसहित उनको परिवारका अन्य दुई सदस्य समेत छन् ।
यसैगरी विराटनगरको न्यूरो हस्पिटलका ३ जना नर्स र म्याक्स अस्पतालका एक जना कर्मचारी पनि छन् । कोशी अस्पतालमा कार्यरत थप २ जना स्वास्थ्यकर्मी र विराट मेडिकल कलेजमा कार्यरत एक जनामा पनि कोरोना देखिएको छ ।
मोरङको रंगेली नगरपालिकामा पनि २२ जनालाई कोरोना पोजेटिभ देखिएको छ । रंगेलीमा १३ पुरूष र ९ महिलामा संक्रमण देखिएको हो ।
कटहरी गाउँपालिकामा २ जना महिलामा संक्रमण देखिएको छ । उता सुनसरीमा ५ जनालाई संक्रमण देखिएको मन्त्रालयले जनाएको छ । इटहरीमा ३, धरान र इनरुवामा १र१ जनालाई संक्रमण देखिएको हो ।
झापामा ५ जनालाई संक्रमण देखिएको छ । झापाको अर्जुनधारमा ४ पुरूष र बिर्तामोडमा १ महिलामा संक्रमण देखिएको हो ।
