साउन ३० –
युरोपियन च्याम्पियन्स लिगको दोश्रो क्वाटरफाइनल खेलमा स्पानिस क्लब एट्लेटिको मड्रिडलाई हराउँदै जर्मन क्लब आरबी लाइपजिग सेमिफाइनलमा पुगेको छ । लाइपजिग पहिलोपटक लिगको सेमिफाइनल पुगेको हो ।
एट्लेटिकोलाई २-१ ले पराजित गर्दै लाइपजिग सेमिफाइनल पुगेको हो । पोर्चुगलको लिस्वनमा भएको खेलको पहिलो हाफ गोलरहित बराबरीमा सकिएको थियो । तर ५०औं मिनेटमा डानी ओल्मोले गोल गर्दै लाइपजिगलाई अग्रता दिलाए । ७१औं मिनेटमा जाओ फेलिक्सले पेनाल्टीमार्फत एट्लेटिकोका लागि बराबरी गोल फर्काए । लाइपजिगका लागि टेलर एडम्सले खेल सकिन दुई मिनेट बाँकी रहँदा गोल गरेपछि लाइपजिगले एट्लेटिकोलाई २-१ ले पराजित गरेको हो ।
लाइपजिगले अब फाइनल प्रवेशका लागि फ्रेन्च क्लब पेरिस सेन्ट जर्मेनसँग खेल्नेछ । च्याम्पियन्स लिगको सेमिफाइनलमा पुग्ने लाइपजिग ३२औं क्लब बनेको छ ।
च्याम्पियन्स लिगको बाँकी क्वाटरफाइनलमा आज राती बायर्न म्युनिख र बार्सिलोना तथा शनिबार राती म्यानचेष्टर सिटी र लियोनबीच खेल हुनेछ ।
