भदौ १, राजविराज –
सहयोद्धा नामक सामाजिक संस्थाले राजविराजमा एक घर एक पिसिआर अभियान सुरु गरेको छ । सप्तरीको राजविराज नगरपालिकालाई केन्द्रित गरेर उक्त संस्थाले एक घर एक पिसिआर परिक्षण गर्नेगरि अभियान सुरु गरेको हो ।
संस्थाले पिसिआर परिक्षण गर्नका लागि स्थायीको घरघरमा पुगेर स्वाब संकलन गर्नेछ। स्वाब संकलन गर्नका लागि आवस्यक पर्ने भिटिएम कीट खरिदका लागि सहयोग रकम समेत संकलन गरिरहेको संस्थाका सदस्य अमर मण्डलले जानकारी दिए ।” एक घर एक पिसिआर,आफैं जुटौं, मौन छ सरकार ” भन्ने मुल नाराका साथ सुरु गरिएको अभियानले कम्तीमा एक घरबाट एकजनाको स्वाब संकलन गरि परिक्षणका लागि गजेन्द्र नारायण अस्पतालमा पठाउनेछ ।
मण्डलका अनुसार अभियानका लागि राजविराज नगरपालिकाको जनस्वास्थ्य महाशाखाले समेत सहकार्य गरेको छ । महाशाखाको समेत समन्वयमा संस्थाको टिमले घरघर पुगेर स्वाब संकलन गर्नेछ। स्वाब संकलनका लागि आवस्यक पर्ने भिटिएम कीट किन्नका लागि सहयोग रकम समेत उठाईरहेको छ। १० दिनमा १ लाख १० हजारभन्दा बढी रकम संकलन भैसकेको मण्डलले जानकारी दिए ।
कोरोना भाइरसको बढ्दो अवस्था र सरकारको जति गर्नुपर्ने हो, त्यति नगरेका कारण संस्थाले अभियान सुरु गरेको उनले बताए । अभियानबाट सरकारलाई खबरदारीका साथै गुणस्तरीय क्वारेन्टाइन तथा आइसुलेसनको व्यवस्था गर्न दबाब समेत दिने उनले बताएका छन् । उनका अनुसार केही दिनभित्रै स्वाब संकलन कार्य सुरु गरिनेछ ।
